काठमाडौं (हाम्रो खेलकुद) – नेपालले एसीसी यू१९ एसिया कप क्रिकेट प्रतियोगितको आफ्नो दोस्रो खेलमा बंगलादेशविरुद्ध पहिला ब्याटिङ गर्ने भएको छ । भर्खर सम्पन्न टसमा बंगलादेशले जितेर पहिला फिल्डिङ गर्ने निर्णय लिएको छ ।

सेमिफाइनलमा पुग्ने यात्रा कायमै राख्न नेपाललाई आजको खेल जित्नै पर्ने हुन्छ । नेपाल पहिलो खेलमा शुक्रबार आयोजक श्रीलंकासँग ५ विकेटले पराजित भएको थियो । नेपालले पहिलो खेलमा श्रीलंकाविरुद्ध कमजोर प्रर्दशन गरेको थियो । श्रीलंकासँग नेपालका ७ ब्याट्सम्यानलले दोहोरो अंकमा रन जोड्न सकेनन् । रित गौतमले ५५ र कप्तान रोहित कुमार पौडेलले ४७ रन प्रहार गर्न बाहेक अन्य ब्याट्सम्यानको प्रर्दशन चिन्ताजकन थियो । बलिङमा पनि नेपालले कमजोर प्रर्दशन गरेको थियो ।

उता बंगलादेशले पहिलो खेलमा यूएईलाई ६ विकेटले पराजित गरेको थियो । आजको खेलमा विजयी भए बंगलादेश सेमिफाइनलमा पुग्ने छ । बंगलादेशको टोलीमा गत वर्ष यू१९ विश्वकपमा शतक प्रहार गर्ने तौहीद हृदोय नेपाललाई घातक बन्न सक्छन् । भारतविरुद्ध त्रिकोणात्मक सिरिजमा शतक प्रहार गर्ने तनजीद हसन र मोहम्मुद हसन जोय पनि बंगलादेशका बलिया हतियार हुन् ।

नेपालले आजको खेलमा एक परिवर्तन गरेको छ । स्पिनर सुर्य तामाङको स्थानमा सन्दीप जोरालाई मैदान उतारेको छ । आजको खेलमा प्रतिस जि.सी, खडक बोहरा, लोकेश बम र सुर्य तामाङ बेन्चमा रहेका छन् ।

नेपालको प्लेइङ ११ : रोहित कुमार पौडेल(कप्तान), भिम सार्की, कुशल मल्ल, सागर ढकाल, आशिफ शेख, कमलसिंह ऐरी, रित गौतम, पवन सरार्फ, राशीद खान, सन्दीप जोरा, हरिबहादुर चौहान