यू १९ एसिया कप – अफगानिस्तान सेमिफाइनल नजिक !

एजेन्सी – अफगानिस्तान एसीसी यू १९ एसिया कप क्रिकेट प्रतियोगिताको सेमिफाइनल नजिक पुगेको छ । दोस्रो खेलमा शनिबार कुवेतलाई ७ विकेटले पराजित गरेपछि सेमिफाइनल नजिक पुगेको हो । आज नै समूह ‘ए’ को खेलमा भारत र पाकिस्तानबीच प्रतिस्पर्धा जारी छ ।

भारतले पाकिस्तानलाई ३ सय ६ रनको विशाल लक्ष्य प्रस्तुत गरेको छ । पाकिस्तान भारतसँग पराजित भए एक खेल अगावै अफगानिस्तान सेमिफाइनलमा पुग्ने छ । कुवेतले प्रस्तुत गरेको सामान्य ८६ रनको लक्ष्य अफगानिस्तानले १२.५ ओभरमा ३ विकेटको क्षतिमा पुरा गर्यो । कप्तान फ्रहान जाखिल ३७ बलमा ५ चौका सहित ३८ रनमा अविजित रहे । रहमानुल्लाहले २८ रन जोडे ।

त्यस अघि टस हारेर पहिला ब्याटिङ थालेको कुवेत २७।३ ओभरमा अल आउट हुँदै ८५ रनमा सेमेटियो । कुवेतका ७ ब्याट्सम्यानले दोहोरो अंकमा रन छुन सकेनन् । उसका ओपनर मिट भावसार २०,गोविन्द्र कुमार १४,फेज कुरेशी र जन्दु हमोयुदले समान १० रन जोडे ।

अफगानिस्तानका लागि शफिकुल्लाह गफ्ररीले ४ र फजल हकले २ विकेट लिए । अफगानिस्तानले पहिलो खेलमा पाकिस्तानलाई डकवर्थ लेविस पद्धतीको आधारमा ८५ रनले पराजित गरेको थियो । अफगानिस्तानले अन्तिम खेल सोमबार भारतसँग खेल्ने छ ।