एजेन्सी – कप्तान लासिथ मालिगांको कीर्तिमानी ५ विकेटसँगै न्युजिल्यान्डसँगको तेस्रो तथा अन्तिम टि२० खेलमा घरेलु टोली श्रीलंका ३७ रनले विजयी भएको छ । श्रीलंकाले प्रस्तुत गरेको १ सय २६ रनको सामान्य लक्ष्य पछ्याएको न्युजिल्यान्ड १६ ओभरमा अल आउट हुदैं ८८ रनमा समेटियो ।

मालिगांले तेस्रो ओभरको तेस्रो,चौथो,पाँचौ र छैटौं बलमा लगातार ४ विकेट लिएपछि सामान्य लक्ष्यमा पनि श्रीलंकाले जित हात पारेको हो । मलिंगाले तेस्रो ओभरको तेस्रो बलमा ओपनर कोलिन मुनरोलाई १२ रनमा बोल्ड आउट गरे ।

चौथो बलमा हमिश राउटफोर्डलाई शून्यमा एलबी डब्लू आउट गर्दा पाँचौ कोलिन डी ग्राण्डहोमलाई पनि शून्यमा बोल्ड आउट गर्दै ह्याट्रिक पुरा गरे । अन्तिम बलमा मालिगांले रोश टेलरलाई पनि शून्यमा एलवी डब्लू आउट गर्दै लगातार चार बलमा चार विकेट लिएका थिए ।

कोलिन मुनरोलाई बोल्ड आउट गरेसँगै टि२० अन्तर्राष्ट्रिय क्रिकेटमा मालिगां १ सय विकेट लिने पहिलो बलरको कीर्तिमान समेत बनाएका छन् । पाँचौ ओभरको चौथो बलमा मलिंगाले टिम सिफर्टलाई ८ रनमा क्याच आउट गराउर्दै पाँच विकेट पुरा गरे ।

मिचेल सान्टनारले १६ रन बनाए । एक समय १० ओभरमा ५२–९ को अवस्थामा पुगेको न्युजिल्यान्डलाई कप्तान टिम साउदीले २३ बलमा ३ छक्का सहित २८ रनमा अविजित रहेपछि हारको अन्तर घटेको थियो । श्रीलंकाको जितमा लागि कप्तान मालिगांले ४ ओभरमा १ मेडन सहित ६ रन खर्चेर ५ विकेट लिए । अलिका धनञ्जयको नाममा २ विकेट रह्यो ।

त्यसअघि टस जितेर पहिला ब्याटिङ थालेको घरेलु टोली श्रीलंकाले निर्धारित २० ओभरमा ८ विकेट गुमाउँदै १ सय २५ रन बनाएको थियो । उसका लागि ओपनर कुशल मेन्डिसले २५ बलमा ४ चौका सहित ३० रन जोडे । त्यस्तै निरोशन डिक्वेला २४,लाहिरु मदुसनका २० र वनिदु हसरान्गाले १४ रनको योगदान दिए ।

न्युजिल्यान्डका लागि मिचेल सान्टनारले ४ ओभरमा १ मेडन सहित १२ रन खर्चेर ३ विकेट लिए । त्यस्तै टोल्ड एस्टलले पनि ३ विकेट लिए । पहिलो र दोस्रो खेल न्युजिल्यान्डले जितेको थियो । ३ टि२० श्रंखला २–१ ले न्युजिल्यान्डले जितेको छ ।