एजेन्सी – श्रीलंकामा बिहीबार सुरु भएको एसीसी यू १९ एसिया कपमा अफगानिस्तानले विजयी सुरुवात गरेको छ । पाकिस्तानलाई ८५ रनले पराजित गर्दै अफगानिस्तानले सानदार सुरुवात गरेको हो ।

१ सय ६३ रनको लक्ष्य पछ्याएको पाकिस्तान १९.४ ओभरमा अल आउट हुँदै ७८ रनमा समेटिएको थियो । पाकिस्तानका लागि इफरान खानले १९ र कप्तान रोहेल नजीरले १६ रन बनाउन बाहेक अन्य कुनै पनि ब्याट्सम्यानले दोहोरो अंकमा रन छुन सकेनन् ।

अफगानिस्तानको कसिलो बलिङ सामु पाकिस्तानका ९ ब्याट्सम्यानले दोहोरो अंकमा रन जोड्न नपाई पेभिलिएन फर्के । पाकिस्तानलाई सस्तैमा रोक्न शफिकुल्लाह गफ्रीले सर्वाधिक ३ विकेट लिए । त्यस्तै फहाज हक,अबिदुल्लाह तनिवाल र नुर अहमदले समान २ विकेट लिए ।

त्यस अघि टस हाररे पहिला ब्याटिङ थालेको अफगानिस्तानले निर्धारित ४६ ओभरमा ९ विकेट गुमाउँदै १ सय ६२ रन बनाएको थियो । उसका लागि रहमनुल्लाहले २७,सेदिकुल्लाह अटल २९,कप्तान फ्रहान जखिलले १९ रनको योगदान दिए ।

नुर अहमदले १७ र जम्सिद खान समान १७ रनमा अविजित रहे । पाकिस्तानका लागि फहाद मुनिर र अमीर अलीले समान ३ विकेट लिए । त्यस्तै अब्बास अफ्रिदीको नाममा २ विकेट रह्यो । अव अफगानिस्तानले शनिबार कुवेतसँग खेल्ने छ । सोही दिन पाकिस्तानले चिरप्रतिद्वन्द्वि भारतको सामना गर्नेछ ।

अर्को समूहमा रहेको नेपालले शुक्रबार श्रीलंकासँग खेल्दै प्रतियोगिताको सुरुवात गर्नेछ । पछिल्लो संस्करणमा नेपाल समूह चरणबाटै बाहिरएको थियो । त्यसअघि सन् २०१७ को संस्करणमा नेपालले सेमिफाइनल सम्मको यात्रा तय गर्ने क्रममा भारतमाथि सनसनीपूर्ण जित निकालेको थियो ।