एजेन्सी – कप्तान विराट कोहलीको कीर्तिमानी शतकसँगै वेस्ट इन्डिजसँगको दोस्रो वान डे खेलमा पाहुना टोली भारत डकवर्थ लेविस पद्धतीको आधारमा ५९ रनले विजयी भएको छ । योसँगै तीन वान डे सिरिजमा भारतले १–० को अग्रता लिएको छ । पहिलो खेल वर्षाको कारण रद्ध भएको थियो ।

जितका लागि २ सय ७० रनको लक्ष्य पछ्याएको वेस्टइन्डिज ४२ ओभरमा अल आउट हुँदै २ सय १० रनमा समेटिएपछि भारत विजयी भएको हो । वेस्ट इन्डिजका लागि ओपनर इभिन लुईसले ८० बलमा ८ चौका र १ छक्का सहित सर्वाधिक ६५ रनको योगदान दिए । त्यस्तै निकोलस पुरनले ५२ बलमा ४ चौका र १ छक्का सहित ४२ रन जोड्दा अन्य ब्याट्सम्यानले राम्रो प्रर्दशन गर्न सकेनन् ।

शिम्रन हिटमायर र रोस्टन चेशले समान १८, जेसन होल्डर १३ र क्रिस गेल ११ रनमा आउट भए । योसँगै गेलले ब्रायन लाराको रेकर्ड तोड्दै वेस्ट इन्डिजबाट सर्वाधिक वान डे खेल खेल्ने र रन बनाउने खेलाडी बनेका छन् । भारतका लागि भुवनेश्वर कुमारले ८ ओभरमा ३१ रन खर्चेर ४ विकेट लिए । मोहम्मद शामी र कुलदीप यादवको नाममा समान २ विकेट रह्यो । खलील अहमद र रविन्द्र जडेजाले १–१ विकेट लिए ।

त्यसअघि टस जितेर ब्याटिङ थालेको भारतले निर्धारित ५० ओभरमा ७ विकेट गुमाउँदै २ सय ७९ रन बनाएको थियो । भारतका लागि कप्तान विराट कोहलीले १ सय २५ बलमा १४ चौका र १ छक्का सहित सर्वाधिक १ सय २० रनको योगदान दिए । कोहलीको यो वान डे करिअरको ४२ औं शतक हो । योसँगै कोहली कप्तानको रुपमा एकै टोलीविरुद्ध सर्वाधिक शतक प्रहार गर्ने खेलाडी बनेका छन् । त्यस्तै कोहलीले सर्वाधिक रन बनाउने सुचिमा सौरभ गांगुलीलाई पनि पछि पारेका छन् । वेस्ट इन्डिजविरुद्ध सर्वाधिक रन बनाउने खेलाडी पनि बनेका छन् ।

मध्यक्रममा श्रेयस ऐरले ६८ बलमा ५ चौका र १ छक्का सहित ७१ रन जोड्दै कप्तान कोहलीलाई राम्रो साथ दिए । ओपनर शिखर धवन २ र रोहित शर्मा १८ रनमा आउट भए । ऋषभ पन्त २०,केदार जाधव र रविन्द्र जडेजाले समान १६ रन बटुले । वेस्ट इन्डिजका लागि कार्लोस वर्थवेटले १० ओभरमा ५३ रन खर्चेर ३ विकेट लिए । रोस्टन चेश र शिल्डन कर्टेलको नाममा समान १ विकेट रह्यो । तेस्रो तथा अन्तिम खेल आगमी बुधबार हुने छ ।