काठमाडौं (हाम्रो खेलकुद) – ग्लोबल टि२० क्यानडा अन्तर्गत एलिमिनेटर खेलमा नेपाली लेग स्पिनर सन्दीप लामिछाने सम्मिलित टोरन्टो नेशनल र तीब्र गतिका बलर सोमपाल कामी रहेको विनिपेग हक्सबीच प्रतिस्पर्धा हुँदै छ । खेल नेपाली समय अनुसार राती २:१५ पछि सुरु हुने छ । आजको विजेता टोली दोस्रो क्वालिफायरमा प्रवेश गर्ने छ ।

आजनै पहिलो क्वालिफायरमा ब्राम्पटन वल्भ्स र भ्यानकुभर नाइट्स भिड्दै छन् । जुन खेल राती १० बजेपछि सुरु हुने छ । यी दुईबीचको विजेता टोली सोझै फाइनलमा प्रवेश गर्ने छ । पराजित टोली टोरन्टो र हक्सबीचको विजेतासँग फाइनल प्रवेशको लागि पुन दोस्रो क्वालिफायर खेल्नेछ ।

ब्राम्पटन ६ खेलमा ४ मा जित र १ मा हारका साथ शीर्ष स्थानमा रहेर क्वालिफायर खेलेको हो । त्यस्तै नाइट्सले पनि ६ खेलमा ३ मा जित र १ मा हारका साथ दोस्रो स्थानमा रहँदै क्वालिफायरमा ब्राम्पटनसँगको भेट पक्का गर्यो ।

टोरन्टोले ६ खेलमा समान ३ मा जित र हारका साथ सहित तेस्रो स्थानमा रह्यो । त्यस्तै हक्सपनि ६ खेलमा २ मा जित र ३ मा हारका सहित अन्तिम चारमा रहेपछि टोरन्टोसँग एलिमेनटरमा प्रतिस्पर्धा गर्न लागेको हो । समुह चरणको खेलमा टोरन्टोले प्रस्तुत गरेको २ सय १७ रनको लक्ष्य हक्सले निर्धारित २० ओभरमा ७ विकेटको क्षतिमा पुरा गरेको थियो । त्यसैले हक्सको मनोबल उच्च छ ।

सन्दीपलाई टोरन्टोले आजको खेलमा निरन्तरता दिन सक्ने संभावना छ । हक्सले सोमपाललाई आजको खेलमा बेन्चमा राख्न सक्छ । डेब्यू खेलमा एडमन्टन रोयल्सबीरुद्ध खराब प्रर्दशन गरेपछि सोमपालको संभावना न्युन भएको हो ।