एजेन्सी – पाहुना टोली भारतले वेस्ट इन्डिजसँगको ३ खेलको टि२० सिरिज क्लिनस्वीप गरेको छ । मंगलबार राती तेस्रो खेलमा घरेलु टोली वेस्ट इन्डिजलाई ७ विकेटले पराजित गर्दै भारतले सिरिज ३-० ले जितेको हो ।

१ सय ४७ रनको विजयी लक्ष्य पछ्याएको भारतले पाँच बल अगाडी नै ३ विकेटको क्षतिमा पुरा गर्यो । भारतको जितमा युवा विकेटकीपर ऋषभ पन्तले ४२ बलमा समान ४ चौका र छक्का सहित ६५ रनमा अविजित रहँदै टोलीको जित पक्का गरे ।

त्यस्तै कप्तान विराट कोहली ४५ बलमा ६ चौका सहित ५९ रनमा आउट भए । ओपनर केएल राहुल २०,शिखर धवन ३ रनमा आउट हुँदा मनिष पाण्डे २ रनमा अविजित रहे । वेस्ट इन्डिजका लागि ओशन थोमसले २ विकेट लिए ।

त्यसअघि टस हारेर ब्याटिङ थालेको वेस्ट इन्डिजले निर्धारित २० ओभरमा ६ विकेट गुमाउँदै १ सय ४६ रन बनाएको थियो । काइरन पोलार्डले ४५ बलमा ६ छक्का र १ चौका सहित ५८ रनको योगदान दिए । त्यस्तै रोभमन पावेल २० बलमा २ छक्का र १ चौका प्रहार गर्दै ३२ रनमा नट आउट रहे । ओपनर इभिस लुईस १०,सुनिल नारायण २,निकोलस पुरन १७ र कार्लोस वर्थवेट १० रनमा आउट भए ।

भारतका लागि युवा खेलाडी दिपक चहरले ३ ओभरमा १ मेडन सहित ४ रन खर्चेर ३ विकेट लिए । नवदीप सैनी २ र राहुल चहरको नाममा १ विकेट रह्यो ।

भारतले पहिलो खेल ४ विकेट र दोस्रो खेल डकवर्थ लेविस पद्धतीको आधारमा २२ रनले जितेको थियो । भारतले वेस्ट इन्डिजसँग थप ३ वान डे र २ टेष्ट खेल्ने छ । पहिलो वान डे खेल बिहीबार हुने छ ।