एजेन्सी – घरेलु टोली इंग्ल्यान्डले अष्ट्रेलियासँगको एसेज सिरिज अन्तर्गत पहिलो टेस्टमा २ सय ५१ रनको लज्जास्पद हार बेहोरेको छ । यस नतिजासँगै पाँच खेलको टेस्ट सिरिजमा पाहुना टोली अष्ट्रेलियाले १-० को अग्रता लिएको छ ।

जितका लागि ३ सय ९८ रनको विशाल लक्ष्य पछ्याएको इंग्ल्यान्ड पाँचौ दिन ५२.३ ओभरमा १ सय ४६ रनमा अल आउट भएपछि ठूलो अन्तरको हार बेहोर्न पुगेको हो । इंग्ल्यान्डका लागि क्रिस वोक्सले सर्वाधिक ३७, जोसन रोय र कप्तान जो रुटले समान २८ रन जोड्न बाहेक अन्य कुनै पनि ब्याट्सम्यानले उल्लेख्य रन जोड्न सकेनन् ।

इंग्ल्यान्डका ६ ब्याट्सम्यान दोहोरो अंकमा रन बनाउन नपाउँदै पेभिलिएन फर्के । इंग्ल्यान्डलाई सस्तैमा अल आउट गर्न राख्न अनुभवी स्पिनर नाथन लायनले २० ओभरमा ५ मेडन सहित ४९ रन खर्चेर ६ विकेट लिए । त्यस्तै प्याट कमिन्सले ४ विकेट हात पारे ।

त्यसअघि चौथो दिन दोस्रो इनिङमा अष्ट्रेलियाले १ सय १२ ओभरमा ४८७-७ को अवस्थामा इनिङ समाप्तीको घोषणा गरेको थियो । स्टिभ स्मिथ २ सय ७ बलमा १४ चौका सहित १ सय ४२ रनमा क्याच आउट भए । म्याथ्यु वेडले पनि १ सय ४३ बलमा १७ चौका सहित १ सय १० रन जोडे ।

तल्लोक्रममा जेम्श प्याटीन्सन ४८ बलमा ४ छक्का र २ चौका सहित ४७ रनमा नटआउट रहे । प्याट कमिन्स २६, कप्तान टिम पेन ३४, ट्राभिस हेड ५१ र उस्मान खवाजाले ४० रन जोडे । इंग्ल्यान्डका वेन स्टोक्सले ३ र मोइन अलीले २ विकेट लिए ।

अष्ट्रेलियाले स्मिथको १ सय ४४ रनको उत्कृष्ट शतकमा पहिलो इनिङमा २ सय ८४ रन बनाएको थियो । जवाफि पहिलो इनिङ थालेको घरेलु टोली इंग्ल्यान्डले रोरी बर्न्सको १ सय ३३ रनको शतकमा ३ सय ७४ रन बनाउँदै ९० रनको अग्रता लिएको थियो । त्यस्तै जो रुट ५७ र बेन स्टोक्सले ५० रनको योगदान दिए । अष्ट्रेलियाका प्याट कमिन्स र नाथन लायनले समान ३ विकेट लिए । दोस्रो टेस्ट १४ अगष्टमा सुरु हुनेछ ।