एजेन्सी – युवा खेलाडी नवदीप सैनीको उत्कृष्ट प्रर्दशनमा वेस्ट इन्डिजसँगको पहिलो टि२० खेलमा भारत ४ विकेटले विजयी भएको छ ।

सामान्य ९६ रनको लक्ष्य पछ्याएको भारतले १७.२ ओभरमा ६ विकेट गुमाउँदै पुरा गर्यो । भारतका लागि ओपनर रोहित शर्माले २५ बलमा समान २ चौका र छक्का सहित २४ रनको योगदान दिए । ऋषभ पन्त डक,शिखर धवन १ र मनिष पाण्डे र कप्तान विराट कोहली समान १९ रनमा आउट भए ।

क्रुनाल पाण्डे १२ रनमा बोल्ड आउट भए । रविन्द्र जडेजा १० र वाशिन्टन सुन्दर ८ रनमा अविजित रहे । वेस्ट इन्डिजका लागि सुनिल नारायण, शिल्डन कर्टेल र किमो पलले समान २ विकेट लिएपनि टोलीको हार टार्न सकेनन् ।

त्यसअघि टस हारेर पहिला ब्याटिङको निम्तो पाएको वेस्ट इन्डिजले निर्धारित २० ओभरमा ९ विकेट गुमाउँदै मात्र ९५ रन बनाएको थियो । सुरुवाती ६ ओभरमै ५ विकेट गुमाएको वेस्ट इन्डिजका लागि काइरन पोलार्डले ४९ बलमा ४ छक्का र २ चौका सहित ४९ रन जोड्दै सम्मानजनक योगफल सम्म पुर्याएका थिए ।

त्यस्तै निकोलस पुरनले १६ बलमा १ चौका र २ छक्का सहित २० रन जोड्न बाहेक अन्यले राम्रो प्रर्दशन गर्न सकेनन् । वेस्ट इन्डिजका ९ ब्याट्सम्यानले दोहोरो अंकमा रन बनाउन सकेनन् । तीन ब्याट्सम्यान डक आउट भए । वेस्ट इन्डिजलाई सस्तैमा रोक्न टि२० डेब्यू गरेका तीब्र गतिका युवा बलर नवदीप सैनीले ४ ओभरमा १ मेडन सहित १७ रन खर्चेर ३ विकेट लिए । सैनीले अन्तिम ओभरमा पोलार्डको विकेट सहित मेडन राखेका थिए ।

भुवनेश्वर कुमारले २ विकेट हात पारे । वासिश्टन सुन्दर, खलील अहमद, क्रुनाल पाण्डे र रविन्द्र जडेजाको नाममा समान १ विकेट रह्यो । तीन टि२० सिरिजमा भारतले १-० को अग्रता लिएको छ । दोस्रो खेल आइतबार खेल्ने छ ।