काठमाडौं (हाम्रो खेलकुद) – अन्तिम बल अनि १ रनको जित । त्यो खुसी, त्यो क्षण नेपाली क्रिकेटकै एक महत्वपूर्ण सफलता । अर्थात नेपालले आजकै दिन गत वर्ष अन्तर्राष्ट्रिय एक दिवसिय मान्यता (ओडीआई) पहिलो जित निकालेको थियो ।

आजकै दिन नेदरल्यान्डलाई १ रनले हराउँदै पहिलो ओडीआई जित्दै नेपालले इतिहास मात्रै रचेन, विश्व क्रिकेटमा नेपाली क्रिकेटको सुन्दर भविष्य रहेको पनि पुष्टि गर्यो । जुन जित सम्झदा अहिले पनि खुसीले मन गदगद हुने गर्दछ ।

गत वर्ष साउन १६ मा नेदरल्यान्डविरुद्ध ओडीआईमा डेब्यू गर्दै नेपालले उपल्लो स्तरको क्रिकेटमा पाइला टेकेको थियो । सन् २०१८ मार्च १५ मा एक दिवसिय मान्यता पाएको नेपालले डेब्यू अगष्ट १ मा गर्यो । ओडीआई मान्यता पाएदेखि हालसम्म नेपालले ६ वान डेमात्रै खेलेको छ । जसको नतिजा समान ३ मा जित र हारको छ । अन्य दुई जितमा भन्दा नेदरल्यान्डसँगको जित विशेष महत्व बोकेको छ ।

त्यो अन्तिम बल र १ रनको जित

खराब ब्याटिङको कारण १ सय ९० रनको विजयी लक्ष्य पछ्याएको नेपाल ४२ ओभरमा १ सय ३४ रनमा अल आउट भएपछि डेब्यू खेलमै नेदरल्यान्डसँग ५५ रनले पराजित हुन पुग्यो । सिरिज बराबर गर्न पहिलो खेल हारेको नेपाललाई दोस्रोमा जित बाहेक अन्य विकल्प थिएन । टस जितेर कप्तान पारस खड्काले पहिला ब्याटिङ गर्ने निर्णय लिए ।

नेपाल ४८.५ ओभरमा अल आउट हुँदै २ सय १६ रन बनायो । प्रतिस्पर्धात्मक योगफल सम्म पुर्याउन कप्तान पारसले ५१ र सोमपाल कामीले ६१ रनको उत्कृष्ट अर्ध शतकीय इनिङ खेलेका थिए । २ सय १७ रनको विजयी लक्ष्य पछ्याएको नेदरल्यान्ड निर्धारित ५० ओभरमा अल आउट हुँदै २ सय १५ रनमा समेटिएपछि नेपाल इतिहास रच्न सफल भएको थियो ।

नेदरल्यान्डलाई जितको लागि अन्तिम ६ बलमा ६ रन चाहिँदा ९ विकेट गुमाई सकेको थियो । कप्तान पारस आफैं बलिङ आए । पारसले पहिलो बलमा फ्रेड क्लासेनलाई १ रन र दोस्रो बलमा पल भान मिकरेनलाई डट गराए । तेस्रो बलमा १ रन खर्चेका पारसले चौथोे बलमा फिल्डिङमा गल्तिहुन पुग्दा २ रन खर्चिए । पाँचौ बल डट गराएपछि खेल थप रोमान्चक मोडमा पुग्यो । नेदरल्यान्डलाई अन्तिम बलमा जितको लागि २ रन चाहिएको थियो । तर पारसले क्वालासेनलाई रन आउट गरेपछि नेपाल १ रनले विजयी भएको थियो ।

नेपालका लागि यो खेलमा जितमात्रै थिएन, ऐतिहासिक पहिलो वान डे सफलता समेत थियो । जसको कारण पनि त्यो जितको महत्व र हर्ष अन्य भन्दा बेग्लै रहन पुग्यो । अझ अन्तिम बलमा १ रनको रोमान्चक जितले झनै विशेष बनायो । जुन जित आज सम्झिँदा पनि त्यतिनै खुसिले उफ्रिन मन लाग्छ ।

१६ महिनामा ६ मात्रै वान डे !

नेपालले वान डे मान्यता पाएको १६ महिना भन्दा बढि भएको छ । नेदरल्यान्डसँगको खेल यता नेपालले चार ओडीआई युएईसँग खेलेको छ । जसमा समान २ मा जित र हार बेहोरेको छ । गत माघमा यूएईलाई २–१ ले हराउँदै पहिलो ऐतिहासिक वान डे सिरिज जित्न सफल भयो ।

त्यसयता भने नेपालले कुनै पनि वान डे खेल खेलेको छैन । नेपाल क्रिकेट संघ (क्यान) आईसीसीको निलम्बनमा रहेको अवस्थामा अन्य देशसँग सहकार्य गर्न नसक्दा नेपालले धेरै सिरिज खेल्न नपाएको हो ।

चिन्ता भविष्यको!

एक दिवसिय मान्यता पाएको १६ महिना पुग्दा ६ ओडीआई मात्रै खेलेको नेपालले वान डे मान्यता राम्रोसँग सदुपयोग गर्न नपाई खेर जानि हो की भनेर चिन्ता बढ्न थालेको छ । अझ यसै साता सिंगापुरमा सम्पन्न आईसीसी टि२० एसिया छनोटमा खराब प्रर्दशन गर्दै बाहिरिएपछि नेपालको भविष्यलाई लिएर थप टिका टिप्पणी बढेको छ ।

नेपालले तत्काल कुनै सिरिज र खेल खेल्ने तालिका छैन । आईसीसी विश्वकप लिग २ अन्तर्गत ओमान र अमेरिकासँग नेपालले आगमी माघ तेस्रो साता टियुमा मैदानमा ओडीआई सिरिज खेल्ने कार्यतालिका रहेको छ ।