एजेन्सी – ग्लोबल टि२० क्यानडामा टोरन्टो नेशनलमाथि विनिपेग हक्सले ३ विकेटको सानदार जित निकालेको छ । गएराती सम्पन्न खेलमा २ सय १७ रनको लक्ष्य पुरा गर्दै नेपाली टोलीका तीव्र गतिका बलर सोमपाल कामी अनुबन्ध रहेको हक्सले सानदार जित पक्का गरेको हो ।

नेशनलले प्रस्तुत गरेको २ सय १७ रनको विशाल विजयी लक्ष्य पछ्याएको हक्सले २० ओभरमा ७ विकेट गुमाउँदै पुरा गर्यो । हक्सको जितमा अष्ट्रेलियाका ओपनर क्रिस लीनले ४८ बलमा १० छक्का र २ चौका सहित ८९ रनको महत्वपूर्ण योगदान दिए । सन्नी सोहलले २७ बलमा ६ छक्का र २ चौका सहित ५८ रन जोडे । शैमान अनवारले ४३ रन जोड्दा अन्यले भने दोहोरो अंकमा रन बनाउन सकेनन् । सन्दीप लामिछाने अनुबन्धीत नेशनलका लागि क्रिस ग्रिन सलमान नजवारले समान २ विकेट लिए ।

त्यस अघि टस हारेर पहिला ब्याटिङ थालेको नेशनलले निर्धारित २० ओभरमा ७ विकेट गुमाउँदै २ सय १६ रन बनाएको थियो । उसका लागि काईरन पोलार्डले २१ बलमा ५ छक्का र ३ चौका सहित ५२ रन जोडे । त्यस्तै ओपनर रोर्डिगो थोमसले ४६ बलमा ५ छक्का र ३ चौका सहित ६५,हेनरिक क्वालासेन १५,चिराग सुरी ५,क्रिस ग्रिन ११ र मनप्रित गोनी १ रनमा आउट भए । कप्तान युवराज सिंहले २६ बलमा ४ चौका र २ छक्का सहित ४५ रनको योगदान दिए । हक्सका लागि ड्वेन ब्राभोले ४ ओभरमा ३९ रन खर्चेर ४ विकेट हात पारे ।

हक्स ३ खेलमा २ मा जित र १ मा हारका साथ दोस्रो स्थानमा छ । यता ३ खेलमा २ मा हार र १ मा जित निकालेको नेशनल भने पाँचौ स्थानमा पुगेको छ । सोमपाल र सन्दीप दुबैलाई पहिलो खेलमा आराम दिएको थियो ।