सिंगापुर (हाम्रो खेलकुद) – नेपाली राष्ट्रिय टोलीका सर्वाधिक अनुभवी स्पिनर वसन्त रेग्मीले उमेर भन्दा पनि फिटनेस महत्वपूर्ण हुने बताएका छन् ।

शनिबार आईसीसी टी२० एसिया विश्वकप छनोट क्षेत्र अन्तर्गत कुवेतलाई सस्तैमा रोक्न ३ महत्वपूर्ण विकेट लिएका वसन्तले हाम्रो खेलकुदसँग कुरा गर्दै यस्तो बताएका हुन् ।

‘आजको खेल जित्नै पर्ने दबाब थियो । एउटा बल पनि कमजोर फाल्दैन भन्ने सोचेको थिए र सफल पनि भएँ’,वसन्तले भने, ‘टिममा प्रतिस्पर्धा हुनु धेरै राम्रो कुरा हो । प्रतिस्पर्धाले टिमलाई बलियो बनाउनुको साथै देशलाई पनि राम्रो गराउँछ ।’

‘अहिले सम्म जति पनि अन्तर्राष्ट्रिय खेल खेलेको छु मलाई लाग्दैन की मैले कुनै पनि खेलमा नराम्रो प्रर्दशन गरे । सधैं राम्रो प्रर्दशन गर्ने सोच हुन्छ’,उनले भने ।

‘ मलाई के लाग्छ भने उमेरले त्यति फरक पार्दैन । आफुले आफुलाई फिट राख्नु पर्यो । मैदानमा कस्तो प्रर्दशन गर्छ त्यसले फरक पार्छ’ , उनले भने ।

‘भोली सिंगापुरसँगको खेल फाइनल सोचेर खेल्यो भने दबाब आउन सक्छ । एउटा सामान्य खेल सम्झेर खेल्नुपर्छ । मैले टिमको लागि कसरी विजयी गराउन सक्छु भन्ने लक्ष्य अघि बढ्ने छु,’ उनले भने ।

वसन्त टी २० आईमा नेपालबाट सर्वाधिक विकेट लिने खेलाडी हुन् । उनले १७ खेलमा २५ विकेट लिएका छन् । नेपालले आईतबार शीर्ष स्थानको सिंगापुरसँग खेल्ने छ । विजेता टोली ग्लोबल छनोटमा पुग्ने छ ।