आयरल्यान्ड जम्मा ३८ रनमा अलआउट!

एजेन्सी – आयरल्यान्डसँगको एकमात्रै टेष्टमा घरेलु टोली इंग्ल्यान्ड १ सय ४३ रनले विजयी भएको छ । शुक्रबार १ सय ८२ रनको लक्ष्य पछ्याएको आयरल्यान्ड १५.४ ओभरमा अल आउट हुँदै ३८ रनमा समेटिएको हो ।

आयरल्यान्डका लागि ओपनर जेम्श म्याकुलमले ११ रन बनाउन बाहेक अन्यले दोहोरो अंकमा रन जोड्न सकेनन् । अर्थात १० ब्याट्सम्यान दोहोरो अंकमा रन बनाउन नपाई आउट भए । ४ ब्याट्सम्यानले खाता खोल्न सकेनन् । आयरल्यान्डलाई सस्तैमा रोक्न इंग्ल्यान्डका क्रिस वोक्सले ७.४ ओभरमा २ मेडन सहित १७ रन खर्चेर ६ विकेट लिए । त्यस्तै स्टुअर्ट बोर्डले ८ ओभरमा ३ मेडन सहित १९ रन खर्चेर ४ विकेट लिए ।

पहिलो इनिङमा ८५ रनमा आउट भएको इंग्ल्यान्डले दोस्रो इनिङमा उत्कृष्ट पुनरागमन गर्दै ३ सय ३ रन बनाएको थियो । नाइटवाचम्यानका रुपमा क्रिजमा आएका बलर ज्याक लिचले ९२ रनको महत्त्वपूर्ण इनिङ खेलेपछि इंग्ल्यान्ड सम्हालिएको थियो । आयरल्यान्डले पहिलो इनिङमा २ सय ७ रन बनाउँदै राम्रो अग्रता लिएपनि दोस्रो इनिङमा खराब ब्याटिङ गर्दा पराजित हुन पुग्यो ।