सुबास हुमागाईं, सिंगापुर

आईसीसी टि-२० विश्वकप एसिया क्षेत्र छनोटअन्तर्गत नेपालले बुधबार र बिहीबार विश्राम पाएको छ । सोमबार कतारसँग पराजित नेपालले मंगलबार मलेसियालाई हराउँदै प्रतियोगितामा फर्केको संकेत दिएको छ ।

कतारविरुद्ध पहिलो खेलमा हार बेहोरेको नेपालका लागि कप्तान पारस खड्का घाइते हुनु अर्को खराब पक्ष रहयो । पारसले बुधबार मलेसियाविरुद्ध खेलमा सहभागिता जनाएनन् । उनको अनुपस्थितिमा ज्ञानेन्द्र मल्लले टोलीको कप्तानी गरेका थिए । ज्ञानेन्द्रले उत्कृष्ट ब्याटिङ गर्दै म्यान अफ द म्याच प्रदर्शन गरेका थिए । उनको कीर्तिमानी अर्धशतकमा नेपाल विजयी रहेको थियो ।

कप्तान पारसले मलेसियाविरुद्ध खेलअघि केहीबेर वार्मअपमा सहभागी भएका थिए । उनले पूर्ण रुपमा भने वार्मअप गरेनन् । अघिल्लो दिन हिड्न समेत अप्ठेरोमा देखिएका पारसले दुखाइ कम भएको बताए । प्रशिक्षक उमेश पटवालका अनुसार पारसको चोट सामान्य रहेको र उनले अर्को खेल खेल्ने बलियो सम्भावना रहेको बताए ।

उपकप्तान ज्ञानेन्द्रले पनि दुई दिन विश्राम रहेका कारण पारस ठिक हुनेमा विश्वस्त रहेको बताए । पारसले पहिलो खेलमा चोटका बाबजुद पनि ब्याटिङ गर्दै राम्रो सुरुवात दिलाएका थिए । पारसलाई ‘मसाल स्पाज्म’ अर्थात ढाडको मांशपेशी खुम्चिएको महसुस भएको थियो, जसका कारण अत्यधिक दुखाइले उनलाई हलचल गर्न असहज भएको थियो । एक दिनको विश्रामपछि दुखाइ धेरै कम भएकाले शनिबार उनी उपलब्ध हुने देखिन्छ ।

नेपालले कुवेतविरुद्ध शनिबार र सिंगापुरविरुद्ध आइतबार खेल्दै प्रतियोगिता अन्त्य गर्नेछ । नेपालले यसबिचमा दुवै दिन प्रशिक्षण गर्ने छैन । लगातार खेलिरहेका कारण चोटको समस्या आउनु स्वभाविक रहेको प्रशिक्षक पटवालले बताए ।