सिंगापुर (हाम्रो खेलकुद) – नेपालले आईसीसी टी २० विश्वकप एसिया छनोट अन्तर्गत आफ्नो दोस्रो खेलमा मलेसियामाथि सानदार जित हात पारेको छ ।

बुधबार मलेसियालाई ७ विकेटले पराजित गर्दै नेपालले अघिल्लो चरणको सम्भावना कायमै राखेको हो । पहिलो खेलमा कतारसँग ४ विकेटले स्तब्ध बनेको नेपालले तेस्रो खेल कुवेतसँग आगमी शनिवार खेल्ने छ । कुवेतमाथि नेपालले फराकिलो जित निकाल्नुपर्ने हुन्छ । अन्तिम खेल आइतबार सिंगापुरसँग खेल्ने छ । अघिल्लो चरणमा प्रवेश गर्न यी दुबै खेलमा नेपालले फराकिलो जित निकाल्नुपर्ने हुन्छ ।

मलेसियाले प्रस्तुत गरेको ८४ रनको लक्ष्य पछ्याएको नेपालले कार्यवाहक कप्तान ज्ञानेन्द्र मल्लको कीर्तिमानी उत्कृष्ट अर्ध शतकमा ८ ओभरमा ३ विकेट गुमाउँदै पुरा गर्यो ।

त्यसअघि टस हारेर पहिला ब्याटिङ गरेको मलेसियाले निर्धारित ९ ओभरमा ७ विकेट गुमाउँदै ८३ रन बनाएको थियो । वर्षाको कारण निर्धारित समय भन्दा झण्डैं २ घण्टापछि सुरु भएको खेल ओभर घटाएर ९ मा झारिएको थियो । नेपालको सहज जितसँगै यी दुई कीर्तिमान पनि बनेका छन् ।

२. उच्च ओपनिङ साझेदारी

बलियो लक्ष्य पछ्याएको नेपालको ओपनर लागि ज्ञानेन्द्र मल्ल र प्रदीप ऐरीले पहिलो विकेटका लागि ५.२ ओभरमा ६६ रनको साझदारी गर्दै सहज जित पक्का गरेका थिए । पहिलो विकेटका लागि प्रदीप र मल्लले गरेको यस साझेदारी नेपालको लागि टी २० आईमा उच्च हो । हिजो कतारसँग कप्तान पारस खड्का र ज्ञानेन्द्र मल्ले पहिलो विकेटका लागि ४९ रनको साझेदारीनै पहिलो विकेटका लागि उच्च रहन पुगेको थियो । जुन आज नै तोडिएको हो ।

यस साझेदारी टी२० आईमा नेपालबाट सर्वाधिक ठूलो तेस्रो साझेदारीमा पर्दछ । नेपालबाट टी ट्वान्टी आईमा उच्च साझेदारी ८५ रहेको छ । सन् २०१४ को टी २० विश्वकपमा पारस र शरद भेषवकरले चौथो विकेटका लागि बंगलादेशसँग गरेको साझेदारीनै हालसम्मको नेपालले टी २० आईमा गरेको उच्च साझेदारीमा पर्दछ ।

१. मल्लको सर्वाधिक छिटो अर्धशतक

नेपालको जितमा नयाक बनेका मल्लले विश्फोटक ब्याटिङ गर्दै नेपालको सहज जितमात्रै पक्का गराएनन् आफ्नो नाममा कीर्तिमान समेत लेखाए । मल्ल टी २० आईमा नेपालबाट सर्वाधिक छिटो अर्ध शतक पुरा गर्ने खेलाडी बनेका छन् । मल्लले २० बलमा अर्ध शतक पुरा गर्दै कीर्तिमान रचेका हुन् । मल्ल टी२० आईमा नेपालबाट सर्वाधिक छिटो अर्धशतक पुरा गर्ने खेलाडी बनेका छन् ।

यसअघि गत साता विनोद भण्डारीले मलेसियासँगको दोस्रो खेलमा २५ बलमा बनाएको अर्ध शतकको रेकर्ड तोडेका हुन् । छैटौं ओभरको पहिलो बलमा छक्का प्रहार गर्दै कीर्तिमान अर्ध शतक पुरा गरेका मल्ल अर्को बलमा क्याच आउट भए । मल्लले २१ बलमा ५ चौका र ३ छक्का सहित ५१ रन जोडे । मल्लको टी२० आईमा यो पहिलो अर्ध शतक हो । नेपालबाट टी२० आईमा अर्ध शतक पुरा गर्ने मल्ल पाँचौ ब्याट्सम्यायन बनेका छन् । मल्लनै खेलमा ‘म्यान अफ द म्याच बने ।