सिंगापुर (हाम्रो खेलकुद) – नेपाली राष्ट्रिय क्रिकेट टोलीका मुख्य प्रशिक्षक उमेश पटवालले ठूला प्रतियोगिता खेल्नेनै अनुभवी खेलाडी रहेको बताएका छन् । मंगलबार कतारसँग ४ विकेटको अप्रत्यासित हारसँगै हाम्रो खेलकुदसँग कुरा गर्दै पटवालले यस्तो बताएका हुन् ।

‘मलाई लाग्छ महत्वपूर्ण प्रतियोगिता खेल्ने नै अनुभवी खेलाडी हुन् । हामीसँग यो नै सहि विकल्प थियो’,पटवालले युवा ब्याट्सम्यानलाई इंगित भने,’ हामीसँग रहेका युवा खेलाडीले उमेर समूहमा राम्रो खेलेका छन् । तर उनीहरुले राष्ट्रिय टोलीबाट खेल्न सक्छन् नै भन्ने हुँदैन ।’ मलेसियासँगको खेलमा खेलाडी परिवर्तन बारे पटवालले पारससँग सल्लाह गर्ने बताए । पटवालले दोस्रो इनिङमा कप्तान पारस खड्का नहुनाले पनि टोलीको प्रर्दशनमा फरक पारेको बताए ।

पटवालले आजको दिन खराब रहेको र कतारले अनुभवी खेलाडीको प्रदर्शनमा जित दर्ता गर्न सकेको बताए । खेलाडीहरुले फरक वातावरण अनुसार आफूलाई तयार गर्न सक्नुपर्नेमा पनि पटवालले जोड दिए । अब बाँकी तीनै खेल जितेर अगाडी जानुको विकल्प नरहेको पटवालको बुझाइ छ ।

नेपालले दोस्रो खेलमा बुधबार मलेसियासँग खेल्ने छ । मलेसियाले पहिलो खेलमा कुवेतलाई ४२ रनले पराजि गर्दै उच्च मनोबलका साथ दोस्रो स्थानमा छ । मलेसियाले घरेलु मैदानमा एक सता अघि नेपालसँगको दुई टी ट्वान्टी सिरिज २–० ले हारेको थियो । तर मलेसियाले दोस्रो खेलमा नेपाललाई कडा टक्कर दिएको थियो । सन् २००९ यूएईमा भएको एसीसी टी२० एसियामा मलेसियाले नेपाललाई ६ विकेटले पराजित गरेको थियो ।