सुबास हुमागाईं, सिंगापुर

नेपाली राष्ट्रिय क्रिकेट टोलीका कप्तान पारस खड्का आईसीसी टि-२ विश्वकप एसिया क्षेत्र छनोटको पहिलो खेलमा कतारविरुद्ध घाइते भएपछि दोस्रो खेलमा नखेल्ने सम्भावना रहेको छ । पहिलो खेलमा कतारसँग पराजित नेपाललाई अर्को झट्का लागेको हो ।

कतारविरुद्ध टस जितेर पहिलो ब्याटिङ रोजेको नेपालले कप्तान पारस र उपकप्तान ज्ञानेन्द्र मल्लको साझेदारीमा राम्रो सुरुवात पाएको थियो । यी दुईले ६ ओभरमा ४९ रनको साझेदारी गरेका थिए । पारस छैटौं ओभरको अन्तिम बलमा लामो सट प्रहार गर्ने धुनमा मिड विकेट बाउन्ड्रीमा समातिएका थिए । तर पारसले इनिङको पहिलो बलमा नै ढाडमा समस्या आएको बताए ।

‘पहिलो बलमा नै मेरो ढाडमा समस्या आयो । मैदानमा हुँदा धेरै दुखाइ थिएन त्यसैले खेलिरहे । आउट भएर फर्केपछि भने दुखाइ बढ्यो । दोस्रो इनिङमा उभिन नै समस्या भएपछि पेभेलियनमै बस्नुपर्यो,’ उनले भने । पारस मैदानमा खेल चलिरहँदा चिन्तित मुद्रामा देखिएका थिए । उनलाई खेलपछि हिड्न नै कठिनाइ भइरहेको थियो । उनको स्थानमा दोस्रो इनिङमा पवन सर्राफले पूरै समय फिल्डिङ गरेका थिए ।

पारसलाई ढाडको समस्या नयाँ भने होइन । यसअघि उनी लामो समय उक्त समस्याबाट पिडित रहेका थिए । यसपटक भने समस्या सामान्य रहेको र केहि विश्रामपछि ठिक हुने उनले बताएका छन् । उनी भोलि खेल्ने वा नखेल्ने टुंगो भने लागिसकेको छैन ।

टोलीका प्रशिक्षक उमेश पटवालले पनि पारस दोस्रो इनिङमा मैदानमा नहुनुले नतिजामा असर परेको स्वीकारे । ‘ पारस एक उत्कृष्ट टोली नेता हुन् । उनले मैदानमा हुँदा रन जोड्ने मात्र नभएर टोलीको हौसला बढाउने र उचित निर्णय लिन सक्छन् । पारस मैदानमा नहुँदा टोलीको प्रदर्शनमा पक्कै असर गरेको हो । तर हारको कारण भने हाम्रो नराम्रो क्रिकेट खेल्नु नै हो,’ पटवालले भने ।

पारसले बुधबार मलेसियाविरुद्ध खेल गुमाएको खण्डमा बिहीबार र शुक्रबार पनि विश्राम लिनेछन् । नेपालले अन्तिम दुई खेल शनिबार र आइतबार आयोजक सिंगापुर र कुवेतसँग खेल्नेछ ।

खेलपछि कप्तान पारसले यसो भने :