विश्वकप छनोट : टस केहि ढिला हुने

सिंगापुर (हाम्रो खेलकुद) – उपाधिको प्रमुख दाबेदार नेपालले आईसीसी टी२० एसिया विश्वकप छनोटको पहिलो खेलमा कतारको सामना गर्दैछ ।

प्रतिकुल मौसमका कारण पिचमा समस्या देखिएपछि टस निर्धारित समयभन्दा ३० मिनेट ढिला हुने भएको छ । अघिल्लो दिन खेलाइएको पिचमा नै दोस्रो दिनको खेल पनि हुने सम्भावना रहेको छ । दोस्रो दिन खेल्न तयार गरिएको पिचमा केहि समस्या आएपछि परिवर्तन गर्न लागिएको हो ।

नेपाल कतारमाथि सहज जित निकाल्दै सुखद सुरुवात गर्न चाहन्छ । उपाधिको एक्लो दाबेदारका रुपमा हेरिएको नेपालले कतारलाई सहजै हराउन सक्ने अनुमान गरिएको छ । कतार सोमबार पहिलो खेलमा आयोजक सिंगापुरसँग ३३ रनले पराजित हुँदै खराब सुरुवात गरेको छ । पहिलो पटक ग्लोबल छनोटमा पुग्ने लक्ष्य राखेको कतारलाई नेपालसँगको खेल जित्नै दबाब छ ।

कतारले सन् २००७ मा कुवतेमा भएको एसीसी टी २० प्रतियोगितामा नेपाललाई ३ विकेटले पराजित गरेको थियो । सन् २००९ मा कतारलाई नेपालले ६ विकेटले पराजित गरेको थियो । आईसीसी टी २० वरीयता अनुसार नेपाल ११ र कतार २१ औं स्थानमा छन् । कतारले नेपालसँग पहिलो पटक टी२० अन्तर्राष्ट्रिय खेल खेल्न लागेको हो ।