सिंगापुर (हाम्रो खेलकुद) – नेपाली राष्ट्रिय क्रिकेट टोलीका कप्तान पारस खड्काले टोलीको प्लेइङ ११ छान्न सहज नभएको बताएका छन् ।

आईसीसी टी२० एसिया विश्वकप छनोटमा कतारसँग खेल्नुअघि हाम्रोखेलकुदसँग कुरा गर्दै पारसले टोलीमा देखिएको तीब्र प्रतिस्पर्धाले प्लेइङ ११ छान्न सहज नभएको बताएका हुन् । ‘मैदानको साइज र वातावरण हेर्दा कसलाई खेलाउने भन्नेबारे विहान मैदान आएपछि सल्लाह गर्नुपर्छ । टिममा उच्च प्रतिस्पर्धा छ । हामी उत्कृष्ट प्लेइङ ११ मैदान उतार्ने छौं’,पारसले भने । खेलाडीमा प्लेइङ ११ पर्न देखिएको तीव्र प्रतिस्पर्धाले टोलीलाई फाइदा पुग्ने पारसको बुझाई छ ।

‘मैदानको आकार र वातावरण हेर्दा सहज छैन । हाम्रो तर्फबाट भने उत्कृष्ट क्रिकेट खेल्नुपर्छ । चोटबाट फर्केपछि दिपेन्द्र तयार छन् । भोली विहान कुन पिचमा खेलाउछन् त्यसमा पनि प्लेइङ ११ भर पर्छ, ‘पारसले थपे । नेपाललाई प्रत्येक बल र खेल महत्वपूर्ण रहेको उनले बताए । पारसले कुनैपनि टोलीलाई कमजोर रुपमा लिन नहुने बताउछन् ।

टोलीको ओपनिङ पारसलेनै गर्ने छन् । पारसले लामो समयदेखि खराब प्रर्दशन गरिरहेका उपकप्तान ज्ञानेन्द्र मल्लबाट सबैले राम्रो प्रर्दशनको आसा राखेको बताए ।

नेपालले मंगलबार कतारसँग खेल्दै एसिया विश्वकप छनोटको सुरुवात गर्ने छ । खेल विहान ७ : १५ पछि सुरु हुने छ । कतार पहिलो खेलमा सोमबार आयोजक सिंगापुरसँग ३३ रनले पराजित भएको छ । अघिल्लो चरणको आसा कायमै राख्न कतारलाई नेपालसँगको खेल जित्नै पर्ने दबाब रहने छ । नेपाल भने कतारमाथि सहज जित निकाल्दै सुखद सुरुवात गर्ने सोचमा रहेको छ ।

कतारले सन् २००७ मा कुवतेमा भएको एसीसी टी २० प्रतियोगितामा नेपाललाई ३ विकेटले पराजित गरेको थियो । त्यस्तै नेपालले सन् २००९ मा कतारलाई ६ विकेटले पराजित गरेको थियो । आईसीसी टी ट्वान्टी वरियता अनुसार यस प्रतियोगितामा नेपाल पछिको बलियो टोली कतार रहेको छ ।

यो पनि : नेपाललाई निराश बनाउन सक्ने कतारका ३ स्टार

यो पनि : नेपालले उपाधि जित्न सक्ने ४ आधार

यो पनि : विश्वकप छनोट : बलियो नेपाललाई कतारको चुनौती