सिंगापुर (हाम्रो खेलकुद) – नेपाली राष्ट्रिय क्रिकेट टोली हाल आईसीसी टि-२० विश्वकपको एसिया क्षेत्र छनोट खेल्न सिंगापुरमा छ । प्रतियोगिता सुरु हुनुअघि पूर्वसन्ध्यामा आयोजित पत्रकार सम्मेलनमा कप्तान पारस खड्काले नेपाली समर्थक टोलीको बलियो पक्षमध्य एक रहेको अभिव्यक्ति दिएका छन् ।

कप्तान खड्काले नेपाली समर्थकहरुले जहाँसुकै गएर खेलेपनि हौसला बढाउन मैदानमा आउँदा टोलीलाई सहज हुने बताए । ‘ हाम्रो समर्थकहरु हामीले प्रत्यक खेल जितेको हेर्न चाहनुहुन्छ । हामी जहाँ गएपनि हाम्रो लागि समर्थकको संख्या बलियो पक्ष हुने गरेको छ । समर्थकले हामीलाई अझै राम्रो प्रदर्शन गर्न प्रेरित गर्नुहुन्छ,’ उनले थपे, ‘ हामीले आशा गरेका छौं कि यहाँ पनि राम्रो संख्यामा दर्शकको उपस्थिति रहनेछ । नेपालमा पनि खेलको प्रत्यक्ष प्रसारण हुने भएकाले थुप्रैले हेर्ने अपेक्षा गरेका छौं । ‘

नेपाली टोलीले विश्वकप खेलेको लामो समय भइसकेको र अबको लक्ष्य अष्ट्रेलियामा हुने विश्वकपको लागि छनोट हुनु रहेको कप्तान खड्काले बताए । ‘ हामीले पछिल्लो पटक सन् २०१४ मा विश्वकप खेलेको धेरै समय भइसकेको छ । अब हाम्रो लक्ष्य अष्ट्रेलिया विश्वकपको लागि छनोट हुनु हो । त्यहाँसम्म पुग्न सहज छैन । पहिला हामीले यो चरण पार गरेर ग्लोबल छनोटमा पुग्नुपर्छ । त्यसपछि हामीले ग्लोबल छनोटबारे सोच्ने हो,’ उनले भने ।

टि-२० फर्म्याटमा जुनै टोलीले पनि जित दर्ता गर्न सक्ने हुनाले हरेक खेललाई गम्भीरतापूर्वक लिने कप्तान खड्काको बुझाइ छ । ‘ प्रतियोगितामा हरेक टोलीले आफ्नो उत्कृष्ट प्रदर्शन गर्ने लक्ष्य राखेको हुन्छ । मलेसियामा गरेको तयारीले हामीलाई केहि सहज हुन्छ तर अन्य टोली पनि राम्रो तयारीसाथ यहाँ आएका छन् । हरेक खेलको महत्त्व छ र हामीले पालैपालो आफ्नो योजना अबलम्बन गर्नेछौं,’ उनले थपे ।

पारसले टोलीको ‘टिम स्पिरिट’ बलियो रहेको र यसले नै टोलीको प्रदर्शनमा सहयोग पुग्ने धारणा व्यक्त गरे । नेपालले प्रतियोगिताको पहिलो दिन कुनै खेल खेल्ने छैन । नेपालको पहिलो खेल मंगलबार कतारविरुद्ध हुनेछ ।