एजेन्सी – इंग्ल्यान्डका स्टार अलराउन्डर बेन स्टोक्सले आफुले जीवनभर न्युजिल्यान्डका कप्तान केन विलियमसनसँग माफि माग्ने बताएका छन् ।

न्युजिल्यान्डलाई सुपर ओभरमा पराजित गर्दै इंग्ल्यानडलाई पहिलो पटक विश्वकप उपाधि जिताउन नायक बनेका स्टोक्सले उपाधि जितेपछि यस्तो बताएका हुन् । २ सय ४२ रनको लक्ष्य पछ्याएको इंग्ल्यान्डलाई जितको लागि अन्तिम ओभरमा १५ रन चाहिएको अवस्थामा ट्रेन्ट बोल्टले सुरुवाती २ बल डट गरे ।

त्यसपछि बेन स्टोक्सले तेस्रो बलमा छक्का र चौथो बलमा २ रन लिँदा मार्टिन गुप्टिलले फ्याकेको थ्रोमा रन लिनेक्रममा स्टोक्सको ब्याट्मा लागेर बल चौका गएपछि इंग्ल्यान्डले ६ रन पाएको थियो । उक्त अोभरथ्रो रनले नै इंग्ल्यान्डले उपाधि यात्रा तय गरेको थियो । स्टोक्सले अन्जानमा भएको उक्त स्थितिलाई लिएर विलियमसनसँग माफी मागेका हुन् ।

इंग्ल्यान्डको लागि बेन स्टोक्स ९८ बलमा ५ चौका र २ छक्का सहित ८४ रनमा अविजित रहे । सुपर ओभरमा पनि स्टोक्सले उत्कृष्ट प्रर्दशन गरेका थिए । उपाधिपछि स्टोक्सले भने,’जीवनभर विलियमसनसँग माफि माग्ने छु । जुन तरिकाले रन आयो मैले त्यस्तो चाहेको थिइँन ।’

इंग्ल्यान्डलाई उपाधि दिलाउन महत्वपूर्ण प्रर्दशन गरेका स्टोक्सले यो प्रर्दशन जीवनभर सधै यादगार रहने बताए । ‘इंग्ल्यान्डले जित्दा म यति खुसी छु की बोल्ने कुनै शब्द छैन । लर्डस मैदानमा समर्थक र परिवारकासाथ म्यान अफ द म्याच जित्नु मेरो लागि सबैभन्दा ठूलो उपलब्धि हो’,उनले भने । बेन स्टोक्सको जन्म सन् १९९१ जुन ४ मा न्युजिल्यान्डको क्राइस्टचर्चमै भएको हो ।