एजेन्सी – एकदिवसिय विश्वकप २०१९ फाइनलमा लागि आज घरेलु टोली इंग्ल्यान्ड र न्युजिल्यान्ड भिड्दै छन् । खेल नेपाली समय अनुसार दिउँसो ३ : १५ पछि लर्डसमा सुरु हुने छ । दुबै टोली पहिलो पटक उपाधि जित्ने दाउमा रहेका छन् ।

सन् १९७९, १९८७ र १९९२ को फाइनलमा पराजित हुँदै तीन पटक उप विजेतामा निराश बनेको इंग्ल्यान्ड यस पटक भने च्याम्पियन बन्न चाहान्छ । तेस्रो स्थानमा रहेर सेमिफाइनल खेलेको घरेलु टोली इंग्ल्यान्डले पाँच पटकको विजेता अष्टेलियालाई सेमिफाइनलमा ८ विकेटले पराजित गर्दै फाइनलमा स्थान बनाएको थियो ।

यता चौथो स्थानमा रहेर सेमिफाइनल खेलेको न्युजिल्यान्डले उपाधिको प्रमुख दाबेदार भारतलाई १८ रनले पराजित गर्दै फाइनलमा लगातार दोस्रो पटक प्रवेश गरेको हो ।

तुलानात्मक रुपमा न्युजिल्यान्ड भन्दा इंग्ल्यान्ड बलियो देखिन्छ । लिग चरणको खेलमा इंग्ल्यान्डले न्युजिल्यान्डलाई १ सय १९ रनको फराकिलो अन्तरले पराजित गरेको थियो । सेमिफाइनलको प्रर्दशन हेर्दा न्युजिल्यान्ड र इंग्ल्यान्डले खेलाडीमा खासै परिवर्तन गर्ने सभावना देखिदैन । इंग्ल्यान्डका लागि जोसन रोय,जोफ्रा आर्चर र जो रुटको प्रर्दशन महत्वपूर्ण हुने छ । पछिल्ला खेलमा विकेटकीपर जस बटलरले ठूलो इनिङ खेल्न सकेका छैनन् । उनिबाट आज ठूलो इनिङको आसा गरिएको छ ।

यता न्युजिल्यान्डका लागि कप्तान केन विलियमसन र रोश टेलर बाहेक अन्य ब्याट्सम्यानको प्रर्दशन सन्तोकजनक छैन । न्युजिल्यान्डको कमजोर पक्ष्य ब्याटिङ देखिएको छ । ओपनर मार्टिन गुप्टिल,हेनरी निकोलस,टम लेथमको खराब प्रर्दशन न्युजिल्यान्डलाई ठूलो चिन्ताको विषय हो । बलिङमा भारतलाई स्तब्ध पार्न उत्कृष्ट प्रर्दशन गरेका म्याट हेनरी र ट्रेन्ट बोल्टको प्रर्दशन आजको खेलमा पनि निर्णायक बन्न सक्छ ।

विश्वकपमा न्युजिल्यान्ड र इंग्ल्यान्डबीच ९ खेल भएको छ । जसमा न्युजिल्यान्ड ५ खेलमा विजयी हुँदा ४ खेलमा पराजित भएको छ । त्यस्तै यी दुईदेशबीच कुल ८९ वान डे खेल भएको छ । जसमा न्युजिल्यान्ड ४३ खेलमा विजयी हुँदा ४० खेलमा पराजित भएको छ । २ खेल बराबरीमा सकिदा ४ खेलको नतिजा बिहीन छ ।