काठमाडौं (हाम्रो खेलकुद) – नेपाल पुलिस क्लबको क्रिकेट टोलीका कप्तान मञ्जित श्रेष्ठको बढुवा भएको छ । सिपाहीबाट मञ्जित हवल्दारमा बढुवा भएका हुन् । नेपाल प्रहरी एआइजी पुलिस खेलकुद समितिका सदस्य सचिव पुष्कर कार्कीले र डिआइजी पुलिस एकेडेमीका निर्देशक दान सिंह बोहोरा बुधबार आयोजित एक कार्यक्रममा मञ्जितलाई दज्र्यान्ही चिन्ह प्रदान गरेका थिए ।

२०६२ मा नेपाल पुलिसमा आबद्ध मञ्जितको कप्तानीमा केहि साता अघि पुलिसले प्रधानमन्त्री कप जितेको थियो । राष्ट्रिय क्रिकेट टोलीका पूर्व खेलाडी ३४ वर्ष मञ्जितले नेपालका सबै उमेर समूहबाट प्रतिनिधित्व गरेका छन् । २०६२ मा मञ्जितसँग पूर्व कप्तान विनोद दास, मनोज कटुवाल र कनिष्क चौगाई पुलिसमा भर्ती भएका थिए । कनिष्क पछि अमेरिका गएका थिए ।

केहि वर्ष सुस्ताएको पुलिस क्लबले २०६७ पुन घरेलु क्रिकेटका राष्ट्रिय प्रतियोगितामा दोस्रो र टि ट्वान्टीमा पहिलो स्थान प्राप्त गरेको थियो । त्यसपछि पनि पुलिस क्रिकेटमा पुनः निस्क्रिय जस्तै रह्यो । २०७२ सालमा पूर्व एआइजी राजेन्द्रसिंह भण्डारी, एसएसपी इश्वरबाबु कार्की र इस्पेक्टर ज्योति कमल गुरुङको पहलमा पुलिस पुनः क्रिकेटमा फर्कियो । टोली तयार भयो । त्यहि बेलादेखि मञ्जितले टोलीको कप्तान गर्दै एक पछि अर्को सफलता दिलाइरहेका छन् ।

घरेलु क्रिकेटमा राम्रो प्रदर्शन गर्दै आएको पुलिसले वैशाखमा प्रदेश ५ मा सम्पन्न आठौं राष्ट्रिय खेलकुदको क्रिकेटमा रजत पदक जितेको थियो । मञ्जितले पछिल्लो पटक सन् २०१४ मा राष्ट्रिय टोलीबाट विश्व कप छनोट खेलेका थिए ।

पुलिसकै कारण खेल जीवनले निरन्तरता पाइरहेको अलराउन्डर मञ्जितले हाम्रो खेलकुदलाई बताए । ‘पुलिसले क्रिकेट टोली बनाउने भनेर सुरुमा पहल गरेको बेला म भर्ती भएको थियो । लामो समय हाम्रो टिम बन्न सकेन,’ उनले स्मरण गरे,‘ तर पनि म पुलिसमा बसिरहे । अहिले हाम्रो टोली बनेको छ । हामी घरेलु क्रिकेटमा राम्रो गरिपनि रहेका छौं ।’

उनले बढुवा हुँदा खुसी लागेको पनि बताए । ‘पुलिसमा नभएको भए सायद म क्रिकेट खेलमा अहिल नहुन पनि सक्थे,’ उनले भने,‘ म भित्रको खेलाडीलाई पुलिसले जोगाइदिएको छ । अहिले त बढुवा पनि भएको छ । टोलीले राम्रो गर्दै गएको खण्डमा भविष्यमा अन्य खेलाडी मेरो अर्को तहमा पनि बढुवा हुन सक्छ । ’

क्रिकेटमा राम्रो गरेकी कारण आफ्नो बढुवा भएको उल्लेख गर्दै मञ्जितले डिएसपी ठकबहादुर केसी र राष्ट्रिय भलिबल टोलीका पूर्व कप्तान इस्पेटर भरत शाहले पुलिस क्लबका खेलाडीहरुलाई प्रोसाहित गर्नमा ठूलो भूमिका खेलेको बताएका छन् ।