एजेन्सी – एकदिवसिय विश्वकप क्रिकेट २०१९ को दोस्रो सेमिफाइनल खेलमा आज घरेलु टोली इंग्ल्यान्डविरुद्ध अष्ट्रेलियाले पहिला ब्याटिङ गर्ने भएको छ ।

बर्मीङघममा टस जितेर अष्ट्रेलियाका कप्तान आरोन फिन्चले पहिला ब्याटिङ गर्ने निर्णय लिएका हुन् । अष्ट्रेलियाले आजको खेलमा उस्मान खवाजाको स्थानमा पिटर हेन्डस्कम्वलाई मैदान उतारेको छ । इंग्ल्यान्डले भने कुनै खेलाडी परिवर्तन गरेको छैन ।

इंग्ल्यान्डको टोली : जोसन रोय,जोनी बेयरस्टो,जो रुट,इओम मोर्गन(कप्तान),बेन स्टोक्स,जस बटलर,क्रिस वोक्स,लियाम प्लन्केट,जोफ्रा आर्चर,आदिल राशिद,मार्क उड ।

अष्ट्रेलियको टिम : डेविड वार्नर,आरोन फिन्च(कप्तान),स्टिभ स्मिथ,पिटर हेन्डस्कम्व,मार्कस स्टोइनिस,ग्लेन म्याक्सवेल,एलेक्स केरी,प्याट कमिन्स,मिचेल स्टार्क,जेसन हेरनडर्फ र नाथन लायन ।

आजको विजेता टोली फाइनला मा पुग्ने छ । बुधबार भारतलाई हराउँदै न्युजिल्यान्ड फाइनलमा स्थान पक्का गरिसकेको छ । आजको विजेताले उपाधिको लागि जुलाई १४ मा न्युजिल्यान्डसँग प्रतिस्पर्धा गर्नेछ । लिग चरणको खेलमा इंग्ल्यान्ड अष्ट्रेलियासँग ६४ रनले पराजित भएको थियो । अष्ट्रेलिया दोस्रो र इंग्ल्यान्ड तेस्रो स्थानमा रहेर सेमिफाइनलमा प्रतिस्पर्धा गर्न लागेका हुन् ।

अष्ट्रेलियाले पाँच पटक विश्वकपको उपाधि जितेको छ । अष्ट्रेलिया साविक विजेता टोली हो । इंग्ल्यान्ड पहिलो पटक उपाधि जित्ने धुनमा छ । इंग्ल्यान्ड सन् १९९२ को फाइनलमा पाकिस्तानसँग २२ रनले हारेदेखी फाइनलमा पुग्न सकेको छैन । अष्ट्रेलिया लगातार र इंग्ल्यान्ड २७ वर्षपछि फाइनलमा पुग्ने धुनमा छन् । इंग्ल्यान्डको लागि जारी जो रुट, बेन स्टोक्स र जोफ्रा आर्चर प्रमुख खेलाडी हुन् । अष्ट्रेलियाका लागि जारी विश्वकपमा २६ विकेट लिएका मिचेल स्टार्क प्रमुख हतियार हुन् । त्यस्तै उत्कृष्ट प्रर्दशन गरि रहेका डेविड वार्नर र आरोन फिन्चको प्रर्दशन पनि महत्वपूर्ण हुने छ ।

इंग्ल्यान्ड र अष्ट्रेलियाबीच विश्वकपमा ८ पटक प्रतिस्पर्धा भएको छ । जसमा इंग्ल्यान्ड २ खेलमा विजयी हुँदा ६ खेलमा पराजित भएको छ । यी दुईदेशबीच १ सय ४८ वान डे खेलमा इंग्ल्यान्ड ६१ खेलमा विजयी हुँदा ८२ खेलमा पराजित भएको छ। ५ खेलको नतिजा बिहीन छ ।