काठमाडौं (हाम्रो खेलकुद) – नेपालले एसीसी यू-१९ इस्टर्न रिजन क्रिकेट प्रतियोगिता २०१९ को उपाधि जितेको छ । मंगलबार हङकङलाई फाइनल खेलमा ६ विकेटले पराजित गर्दै नेपाल च्याम्पियन बनेको हो । यससँगै नेपाल एसीसी यू-१९ एसिया कपको लागि छनोट भएको छ ।

किनारारा ओभल क्रिकेट मैदानमा टस हारेर ब्याटिङ थालेको हङकङ ४३.१ ओभरमा अल आउट हुँदै ९५ रनमा समेटियो । हङकङले प्रस्तुत गरेको ९६ रनको लक्ष्य नेपालले १७ औं ओभरमा ४ विकेटको क्षतिमा पूरा गर्दै च्याम्पियन बनेको हो । नेपालले समुह चरणमा चीन र सिंगापुरमाथि सहज जित निकालेको थियो । सेमिफाइनल खेलमा आयोजक मलेसियालाई पनि सहजै पराजित गरेको थियो ।

च्याम्पियन नेपाल २८ अगस्ट देखी ८ सेप्टेम्बरसम्म श्रीलंकामा हुने एसिया कप खेल्न पाउने छ । एसिया कपमा नेपाल,भारत,पाकिस्तान, बंगलादेश, अफगानिस्तान, यूएई र कुवेत रहेका छन् । फाइनल खेलमा हङकङलाई पराजित गर्दै नेपाललाई च्याम्पियन बनाउँदा नायक ३ खेलाडी :

३. पवन सरार्फ

नेपाललाई च्याम्पियन बनाउन ओपनर पवन सरार्फको प्रर्दशन मत्वपूर्ण रह्यो । सामान्य रनको लक्ष्य सहजै पुरा गर्न पवनले ३९ रनको योगदान दिए । १२ ओभरको दोस्रो बलमा मोहम्मद हसनले एलवी डब्लू आउट गनुअघि उनले ३६ बलमा ५ चौका र १ छक्का सहित ३६ प्रहा गरे । उनले ओपनर रित गौतमसँग पहिलो विकेटका लागि ६.३ ओभरमा ५२ रनको साझेदारी गरेका थिए ।

२. कुशल मल्ल

अलराउन्डर कुशल मल्लले हङकङलाई सस्तैमा रोक्न घातक बलिङ गरे । कुशलले ८.१ ओभरमा ५ मेडन सहित ४ रन खर्चेर १ विकेट लिए । कुशलले कुनै पनि समय हङकङका ब्याट्सम्यानलाई खुलेर खेल्न दिएनन् । कुशलले सागरलाई राम्रो साथ दिदै हङकङलाई सस्तैमा अल आउट गर्दै नेपालको जित पक्का गरे ।

१. सागर ढकाल

स्पिनर सागर ढकालले आफ्नो उत्कृष्ट लयलाई फाइनल खेलमा हङकङविरुद्ध पनि निरन्तरता दिए । हङकङलाई सस्तैमा समेट्न नायक बनेका सागरले १० ओभरमा ५ मेडन सहित १८ रन खर्चेर ५ विकेट लिए । जसक्रममा शीर्षक्रमका तीन ब्याट्सम्यानलाई शुन्यमा पेभिलिएन फर्काए । सागरले कुनै पनि समय हङकङका ब्याट्सम्यानलाई खुलेर खेल्न दिएनन् । निरन्तर दबाबमा राखे । सागरले सम्रग प्रतियोगितामा ४ खेलमा १५ विकेट लिदै सर्वाधिक विकेट लिने खेलाडीको सुचिमा शीर्ष स्थानमा रहे ।