एजेन्सी – इंग्ल्यान्ड र वेल्समा जारी एक दिवसिय विश्वकप क्रिकेटमा अष्ट्रेलियालाई चोटले समस्या परेको छ । प्रशिक्षण नेट्समा ब्याटिङ गर्ने क्रममा मध्यक्रमका भरपर्दा ब्याट्सम्यान सन मार्श र आक्रामक ब्याट्सम्यान ग्लेन म्याक्सवेल घाइते भएका छन् ।

मार्श मंगलबार अभ्यासको क्रममा प्याट कमिन्सको सर्ट बलमा घाइते हुन पुगेका थिए । म्याक्सवेल पनि सोहि पिचमा प्रशिक्षण गर्ने क्रममा घाइते भएका थिए । उनलाई मिचेल स्टार्कको बाउन्सर हातमा लागेको थियो । अर्का ब्याट्सम्यान स्टिभ स्मिथलाई पनि प्रशिक्षणमा बाउन्सर लागेको थियो । उनलाई भने कुनै चोट लागेको छैन । यी तीनै घटना १० मिनेटको अन्तरमा भएको बुझिएको छ ।

क्रिकेट अष्ट्रेलियाका अनुसार मार्शको नाडीमा गम्भीर चोट लागेको कारण उनको स्थानमा विकेटकीपर पिटर ह्यान्ड्सकम्बलाई टोलीमा बोलाइएको छ । म्याक्सवेलको अवस्था भने सामान्य रहेको र उनले केहि समय विश्राम लिने बुझिएको छ । उनले दक्षिण अफ्रीकाविरुद्ध भन्ने खेल्नेमा शंका उब्जिएको छ ।

ह्यान्ड्सकम्ब अष्ट्रेलिया ‘ए’ टोलीमा रहेर इंग्ल्यान्ड भ्रमणमा रहेकाले उनले प्रशिक्षण पनि थालिसकेका छन् । उनी दक्षिण अफ्रीकाविरुद्ध खेलका लागि उपलब्ध भएका छन् । विकेटकीपर समेत रहेका ह्यान्ड्सकम्बले २१ वान डे खेलमा १ शतक र ४ अर्धशतक सहित कुल ६ सय २८ रन जोडेका छन् । उनले गत मार्चमा भारतसँगको चौथो वान डे खेलमा ३ सय ५९ रनको विशाल लक्ष्य पुरा गर्दा १ सय १७ रनको उत्कृष्ट इनिङ खेलेका थिए । शन मार्शले विश्वकपमा २ खेलमा मौका पाउँदा २६ रनमात्रै बनाए ।

अष्ट्रेलिया ८ खेलमा ७ मा जित र १ मा हारका साथ १४ अंक जोड्दै शीर्ष स्थानमा छ । सेमिफाइनलमा पुगिसकेको अष्ट्रेलियाले लिग चरणको अन्तिम खेल शनिवार दक्षिण अफ्रिकासँग खेल्ने छ ।