काठमाडौं (हाम्रो खेलकुद) – नेपाल एसीसी यू१९ इस्टर्न रिजन २०१९ प्रतियोगिताको सेमिफाइनलमा प्रवेश गरेको छ । बुधबार पहिलो खेलमा चीनलाई १० विकेटले पराजित गर्दै सेमिफाइनल प्रवेश गरेको हो ।

चीनले समुह चरणका दुबै खेल हारेपछि नेपाललाई सेमिफाइनल प्रवेशका लागि पहिलो जितनै प्राप्त बनेको हो । त्यस्तै नेपालको समुहमा रहेको सिंगापुर पनि सेमिफाइनलमा प्रवेश गरेको छ । नेपालले दोस्रो खेल आगमी शुक्रबार सिंगापुरसँग खेल्ने छ । सिंगापुर र नेपालबीचको नतिजाले समुह विजेता र उप विजेताको टुङ्गो लाग्ने छ । चीन मंगलबार सिंगापुरसँग ८ विकेटले पराजित भएको थियो ।

किनरारा ओभल क्रिकेट मैदानमा टस हारेर पहिला ब्याटिङको निम्तो पाएको चीन २३.१ ओभरमा अल आउट हुँदै ५३ रनमा समेटिएको थियो । नेपालको घातक बलिङ सामु चीनका ९ ब्याट्सम्यानले दोहोरो अंकमा रन बटुल्न सकेनन् । चीनले प्रस्तुत गरेको ५४ रनको सामान्य लक्ष्य नेपालले ५ ओभरमै कुनै विकेट नगुमाई पुरा गर्यो । तुलानात्मक रुपमा निकै कमजोर टोली चीनमाथि नेपालले जित निकाल्नु कुनै नौलो र आश्चर्य भने छैन । तर नेपाललाई सहज जित दिलाउँदै सेमिफाइनल प्रवेश गराउन यी ३ खेलाडीको महत्वपूर्ण प्रर्दशन भने महत्वपूर्ण रह्यो ।

३. तिलकराज भण्डारी

यू१६ टोलीमा उत्कृष्ट प्रर्दशन गर्दै यू१९ टोलीमा स्थान बनाएका लेगस्पिनर तिलकराज भण्डारीले डेब्यू खेलमै उत्कृष्ट प्रर्दशन गरे । तिलकले चीनको मध्यक्रम धराशायी बनाए । उनले १५ ओभरको पहिलो बलमा झंयु युन फेनलाई ४ रनमा बोल्ड आउट गर्दै डेब्यू पहिलो विकेट हात पारे ।

तिलकले लिएको महत्वपूर्ण विकेट ओपनर लियाङ्ग चेनको थियो । चेनलाई तिलकले १७ ओभरको अन्तिम बलमा विकेटकीपर हरि बहादुर चौहानबाट १३ रनमा क्याच गराउँदै पेभिलिएनको बाटो देखाए । अन्य सबै ब्याट्सम्यान नेपाली बलर सामु निरिह बन्दा चेनले ४३ बलको सामना गर्दै २ चौका प्रहार गरे । त्यस्तै तिलकले रुइ होयुलाई ३ रनमा क्याच आउट गराएका थिए । सम्रगमा उनले ७ ओभरमा ३ मेडन राख्दै १५ रन खर्चेर ३ विकेट हात पारे ।

२. पवन सरार्फ

५४ रनको लक्ष्य ५ ओभरमै पुरा गर्न सिनियर टोलीबाट प्रतिनिधित्व गरि सकेका पवन सरार्फले आक्रमक ब्याटिङ गर्दै टोलीको जित पक्का गरे । पहिलो बलमै चौका प्रहार गर्दै सुरुवात गरेका पवनले अन्त्य पनि चौका प्रहार गर्दै गरेका थिए । निकै कमजोर देखिएका चीनका बलर सामु पवनले २१ बलमा ६ चौका र ३ छक्का सहित ४६ रनमा अविजित रहँदै सहज जित पक्का गरे ।

३.सागर ढकाल

स्पिनर सागर ढकालले आफ्नो यू१९ क्रिकेट करियरकै उत्कृष्ट प्रर्दशन गरेपछि चीन ५३ रनमा समेटिएको थियो । नेपालले सुरुवाती ५ ओभरसम्म कुनै विकेट हात पारेको थिएन । कप्तान रोहित कुमार पौडेलले पनि दुई तीव्र गतिका बलर प्रतिस जिसी र कमलसिंह ऐरीले विकेट लिन नसकेपछि छैटौं ओभरमा स्पिनर सागर ढकाललाई ल्याउने निर्णय गरे ।

सागरले निर्णयलाई कप्तानको सहित सावित गर्दै ओपनर गौओहओ गाओलाई १३ रनमा क्याच आउट गर्दै नेपाललाई पहिलो सफलता दिलाए । गाओ आउटभएसँगै चीनको निरन्तर विकेट पतन सुरु भएको थियो । सागरले शीर्षक्रम र मध्यक्रमका ब्याट्सम्यानलाई आफ्नो स्पिनरको जालोमा फसाउँदै कसैलाई पनि दोहोरो अंकमा रन जोड्न दिएनन् । चीनलाई ५३ रनमा अल आउट गर्न सागरले ९.१ ओभरमा ३ मेडन सहित १९ रन खर्चेर ६ विकेट लिएपछि चीन ५३ रनमान समेटिएको थियो । उत्कृष्ट प्रर्दशन गरेका सागर ‘म्यान अफ द म्याच’ घोषित भए ।