एजेन्सी – आईसीसी एकदिवसिय विश्वकप क्रिकेट प्रतियोगितामा आज श्रीलंका र वेस्टइन्डिज भिड्दै छन् । खेल नेपाली समय अनुसार दिउँसो ३:१५ देखि सुरु हुने छ ।

वेस्टइन्डिज ७ खेलमा १ मा जित र ५ मा हारका साथ नवौं स्थानमा रहँदै प्रतियोगिताबाट बाहिरिसकेको छ । यसैकारण वेस्टइन्डिज बिना दबाब मैदान उत्रँदै उत्कृष्ट प्रर्दशन गर्ने सोचमा छ । यता श्रीलंकाको पनि अघिल्लो चरण पुग्ने सम्भावना लगभग सकिएको छ । झिनो अंक गणीतिय सम्भावना रहेको श्रीलंका आजको खेलमा पराजित भए आधिकारीक रुपमा प्रतियोगिताबाट बाहिरिने छ । श्रीलंका ७ खेलमा २ मा जित र ३ मा हारका साथ सातौं स्थानमा छ । २ खेल वर्षाले रद्द भएको श्रीलंकाको ६ अंक छ ।

श्रीलंका मध्यक्रम र तल्लोक्रमका ब्याट्सम्यानको खराब प्रर्दशन ठूलो चिन्ताको विषय हो । त्यस्तै वेस्ट इन्डिजको पनि ब्याटिङ कमजोर मानिएको छ । क्रिस गेल, शिमरोन हिटमायर र शाई होपजस्ता ब्याट्सम्यान चल्न नसक्नु ठूलो चिन्ताको विषय हो । लासिथ मलिंगा, कप्तान दिमुथ करुणारत्ने, कुशल परेरा श्रीलंकाका प्रमुख खेलाडी हुन् ।

विश्वकपमा श्रीलंका र वेस्ट इन्डिजबीच ८ खेल भएको छ । जसमा वेस्ट इन्डिज ४ खेलमा विजयी हुँदा ३ खेलमा पराजित भएको थियो । १ खेलको नतिजाविहीन छ । यी दुई देशबीच कुल ५६ वान डे खेल भएको छ । वेस्ट इन्डिज २८ खेलमा विजयी हुँदा २५ खेलमा पराजित भएको छ । ३ खेल नतिजाबिहीन छ ।