एजेन्सी – एकदिवसिय विश्वकप क्रिकेटमा आज भारत र इंग्ल्यान्ड भिड्दै छन् । खेल नेपाली समय अनुसार दिउँसो ३:१५ देखि सुरु हुनेछ ।

श्रीलंका र पाकिस्तानसँग अप्रत्यासित हार बेहोरेको घरेलु टोली इंग्ल्यान्डलाई शीर्ष चारमा रहेर सेमिफाइनल खेल्न आजको खेल जित्नै पर्ने दबाब छ । ७ खेलमा ४ मा जित र ३ मा हारका साथ पाँचौ स्थानमा रहेको इंग्ल्यान्ड आजको खेलमा पराजित भए सेमिफाइनल यात्राको संभावना अंक गणितीयमात्रै बाँकी रहने छ ।

यता ६ खेलमा ५ मा जितका साथ दोस्रो स्थानमा रहेको भारत आजको खेलमा विजयी भए सेमिफाइनलमा प्रवेश गर्ने छ । भारत पनि त्यहि सोचमा मैदान उत्रने छ । गत वर्ष इंग्ल्यान्डले घरेलु मैदानमा भएको ३ वान डे सिरिजमा भारतलाई २–१ ले हराएको थियो । त्यो सिरिजको नतिजाले इंग्ल्यान्डको मनोबल अलि उच्च हुने छ ।

तर श्रीलंकासँगको अप्रत्यासितको हारले इंग्ल्यान्ड टोली ठूलो दबाबमा छ । दबाबमा इंग्ल्यान्ड कस्तो खेल्न सक्छ त्यसमा बढी निर्भर रहने छ । भारत आज नयाँ जर्सिमा मैदान उत्रने छ ।

इंग्ल्यान्डका ओपनर जोसन रोय आज टोलीमा फर्किने छन् । रोयको आगमले इंग्ल्यान्डलाई ठूलो राहत पुग्न सक्छ । वेस्ट इन्डिजसँगको खेलमा घाइते भएका रोयले श्रींलका,अष्टेलिया र अफगानिस्तानसँगको खेल गुमाउनु परेको थियो । रोयको अभावमा श्रीलंका र अष्टेलियासँगको खेलमा इंग्ल्यान्डको ब्याटिङ कमजोर मानिएको थियो । त्यस्तै ओपनर जोनी बेयरस्टोलाई पनि ठूलो इनिङ खेल्न दबाब छ । जो रुट,जोफ्रा आर्चर,बेन स्टोक्स र जस बटलरको प्रर्दशन इंग्ल्यान्डको लागि आज महत्वपूर्ण हुने छ ।

यता भारतलाई चौथो नम्बरकै चिन्ता छ । चौथो नम्बरको विजय शंकरको स्थानमा आज भारतले दिनेश कात्तिक वा ऋषभ पन्तलाई मौका दिन सक्ने संभावना रहेको छ । अन्य खेलाडी भने परिवर्तन गर्ने देखिदैन । विराट कोहली,रोहित शर्मा,जसप्रित बुमराह भारतका मुख्य हतियार हुन् । शीर्षक्रमका ब्याट्सम्यानमा निर्भर भारतको लागि मध्यक्रम र तल्लोक्रम भने उसको मुख्य कमजोरी हो ।

भारत र इंग्ल्यान्डबीच कुल ९९ एक दिवसिय खेल भएको छ । जसमा भारत ५३ खेलमा विजयी हुँदा ४१ खेलमा पराजित हुन पुगेको छ । ३ खेलको नतिजा विहीन छ । विश्वकपमा भने यी दुईदेशबीच ७ खेल भएको छ । जसमा समान ३ खेलमा इंग्ल्यान्ड र भारत विजयी भएका छन् भने एक खेल बराबरीमा सकिएको छ ।