काठमाडौं (हाम्रो खेलकुद)– खेलकुद पत्रकार सरिता श्रेष्ठ र क्रिकेट खेलाडी कविता कुँवरलाई प्रमोदराज सावित्री पाण्डे स्मृति प्रतिष्ठानले शनिबार पुरस्कृत गरेको छ ।

राजधानीमा आयोजित कार्यक्रममा एभिन्यूज टेलिभिजनकी खेल पत्रकार श्रेष्ठलाई प्रमोद पुरुषोत्तमराज पाण्डे स्मृति खेल पत्रकारिता पुरस्कारबाट सम्मान गरेको हो । श्रेष्ठ डेढ दशकदेखि सक्रिय खेल पत्रकारिता गर्दै आएकी छिन् ।

प्रतिष्ठानले कवितालाई प्रमोद पुरुषोत्तमराज पाण्डे स्मृति उदियमान महिला क्रिकेट खेलाडी पुरस्कार प्रदान गरेको हो । नेपाली राष्ट्रिय क्रिकेट टोलीकी नियमित सदस्य रहँदै आएकी कविता सुदूरपश्चिमबाट खेल्ने गर्छिन् । उनी भर्खरै सम्पन्न प्रधानमन्त्री कप टि-२० प्रतियोगिताको बेस्ट ब्याट्सवुमन पनि बनेकी थिइन् । त्यस्तै साहित्यकार गीता त्रिपाठीलाई प्रमोदराज सावित्रिी पाण्डे स्मृति साहित्य पुरस्कार प्रदान गरिएको थियो । तीनै जनाले सम्मान पत्र र समान १५ हजार रुपैयाँ प्राप्त गरे ।

कार्यक्रममा वरिष्ठ कलाकार भुवन चन्द थापा र बसुन्धरा भुसाललाई प्रमोदराज सावित्री पाण्डे सम्मान गरिएको थियो । नेपाल ललितकला प्रज्ञा प्रतिष्ठानका कुलपति केके कर्माचार्य र प्रतिष्ठानका अध्यक्ष मनिषराज पाण्डेले उनीहरुलाई पुरस्कृत र सम्मान गरे ।