एजेन्सी – एकदिवसिय विश्वकप क्रिकेट प्रतियोगिता अन्तर्गत शनिवार पहिलो खेलमा पाकिस्तानविरुद्ध अफगानिस्तानले पहिला ब्याटिङ गर्ने भएको छ ।

भर्खर सम्पन्न टसमा अफगानिस्तानका कप्तान गुलबदीन नाइबले जितेर पहिला ब्याटिङ गर्ने निर्णय लिएका हुन् । पाकिस्तानले आजको खेलमा कुनै खेलाडी परिवर्तन गरेको छैन । अफगानिस्तानले भने एक खेलाडी परिवर्तन गरेको छ । दलात जदरानको स्थानमा हमिद हसनलाई मौका दिएको छ ।

पाकिस्तानको प्लेइङ ११ : इमाम उल हक, फकार जमान, बाबर आजम, मोहमद हफिज, सरफराज अहमद (कप्तान), हरिस सोहेल, इमाद वसीम, वाहब रियाज, शादब खान, मोहमद आमीर, शाहिन अफ्रिदि ।

अफगानिस्तानको प्लेइङ ११ : रहमत शाह,समिउल्लाह शिनवारी , नजिवुल्लाह, हशमतुल्ला शाहीदि, अस्गर अफगान, मोहम्मद नाबी, इकराम अलिखिल, गुवदीन नाइब(कप्तान), राशिद खान, मुजिव उर रहमान, अमिद हसन ।

७ खेलमा समान ३ मा जित र हारका साथ छैटौं स्थानमा रहेको पाकिस्तान आजको खेलमा विजयी भए घरेलु टोली इंग्ल्यान्डलाई पछि पार्दै चौथो स्थानमा उक्लिने छ । आजको खेलमा पराजित भए शीर्ष चारमा रहेर सेमिफाइनल खेल्ने संभावना अंक गणितीय झिनो आसा मात्रै बाँकी रहने छ । पाकिस्तानको नतिजाले घरेलु टोली इंग्ल्यान्डलाई ठूलो प्रभाव पार्नेछ ।

प्रतियोगिताबाटै बाहिरिसकेको अफगानिस्तानलाई भने आजको खेल प्रतिष्ठाको लडाइँ हुनेछ । बिना दबाब मैदान उत्रने अफगानिस्तान पहिलो जितको खोजिमा छ । सुरुवाती ७ खेलमा पराजित हुँदै अफगानिस्तान लिग चरणबाटै बाहिरिसकेको छ । विश्वकपमा अफगानिस्तान र पाकिस्तान पहिलो पटक भिड्न लागेका हुन् । यी दुई देशबीच ३ वान डे खेल भएको छ । जसमा तीनै खेलमा पाकिस्तान विजयी भएको छ ।

संयोग नै मान्नुपर्छ, पाकिस्तानको सुरुवाती ७ खेलमा सन् १९९२ र २०१९ को विश्वकपको नतिजा ठ्याक्कै मिल्न पुगेको छ । सन् १९९२ मा विश्वकप उपाधि जित्दा पाकिस्तानले पहिलो खेल हारेको थियो । दोस्रोमा जित, तेस्रो वर्षाको कारण रद्ध हुँदा चौथो र पाँचौ खेल हारेको थियो । छैटौं र सातौ खेल जित निकालेको थियो । जुन यस विश्वकपमा पनि पाकिस्तानले नतिजा त्यहि रहेको छ ।

न्युजिल्यान्डसँगको खेलमा शतक प्रहार गरेका बाबर आजम, ह्यारिस सोहेल र तीव्र गतिका बलर मोहम्मद आमिर पाकिस्तानका प्रमुख हतियार हुन् । हसन अल र सोएब मालिकको खराब प्रर्दशन चिन्ताको विषय हो ।

लेग स्पिनर राशिद खानको खराब प्रर्दशन अफगानिस्तानलाई घातक बन्न पुगेको छ । कमजोर ब्याटिङ अफगानिस्तानको ठूलो चिन्ताको विषय हो । मोहम्मद नाबी र मुजिव उर रहमान उसका प्रमुख खेलाडी हुन् ।