एजेन्सी – एकदिवसिय विश्वकप क्रिकेट प्रतियोगिता अन्तर्गत शनिवारको दोस्रो खेलमा साविक विजेता अष्ट्रेलिया र उपविजेता न्युजिल्यान्ड भिड्दै छन् । खेल नेपाली समय अनुसार बेलुका ६:१५ पछि क्रिकेटको मक्का मानिने लड्स मैदानमा सुरु हुनेछ ।

अष्ट्रेलिया यसअघि नै सेमिफाइनलमा पुगिसकेको छ । अष्ट्रेलिया शीर्ष स्थानमा रहेर सेमिफाइनल खेल्न आजको खेल जित्नु पर्ने हुन्छ । अष्टेलिया ७ खेलमा ६ मा जित र १ मा हारका साथ शीर्ष स्थानमा छ । यता ७ खेलमा ५ मा जित र १ मा हारका साथ तेस्रो स्थानमा रहेको न्युजिल्यान्ड पनि सेमिफाइनल नजिक छ । आजको खेलमा विजयी भए एक खेल अगावै सेमिफाइनलमा प्रवेश गर्ने छ ।

सन् २०१५ को विश्वकप फाइनलमा अष्टेलियाले न्युजिल्यान्डलाई ७ विकेटले पराजित गर्दै पाँचौ पटक च्याम्पियन बनेको थियो । यस पटक पनि उपाधिको दाबेदार मानिएको अष्टेलिया त्यो नतिजा दोहोराउन चाहान्छ । जारी विश्वकपमा २-२ शतक प्रहार गरेका ओपनर डेविड वार्नर र कप्तान आरोन फिन्चको प्रर्दशन आजको खेलमा पनि महत्वपूर्ण हुने छ ।

वार्नरले ७ खेलमा २ शतक र ३ अर्ध शतक सहित ५ सय रन बनाउदै शीर्ष स्थानमा छन् । त्यस्तै दोस्रो स्थानमा रहेका कप्तान फिन्चले पनि समान खेलमा २ शतक र ३ अर्ध शतक सहित ४ सय ९६ रन बटुलेका छन् । त्यस्तै तीब्र गतिका बलर मिचेल स्टार्कले ७ खेलमा १९ विकेट लिर्दै सर्वाधिक विकेट लिने खेलाडीको सुचिमा शीर्ष स्थानमा छन् । स्टार्कको घातक बलिङमा सहज जित हात पार्न सक्छ ।

यता न्युजिल्यान्डका लागि कप्तान केन विलियमसनको प्रर्दशन निकै महत्वपूर्ण हुने छ । विलियमसनले ५ खेलमा २ शतक र १ अर्ध शतक सहित ४ सय १४ रन बनाई सकेका छन् । अष्टेलियाका लागि विलियमसन घातक बन्न सक्छन् । ओपनर मार्टिन गुप्टिल,कोलिन मुनरो,मध्यक्रमका टम लेथम,रोस टेलरको खराब प्रर्दशन न्युजिल्यान्डको लागि चिन्ताको विषय बनेको छ । ट्रेन्ट बोल्ट र ल्योकी फर्गुसन न्युजिल्यान्डका बलिङ हतियार हुन् ।

विश्वकपमा यी दुई देशबीच १० खेल भएको छ । जसमा न्युजिल्यान्ड ३ खेलमा विजयी हुँदा ७ खेलमा पराजित हुन पुगेको छ । यी दुई देशबीच कुल १ सय ३६ वान डे खेल भएको छ । जसमा अष्टेलियाले ९० खेलमा जित निकाल्दा ३९ खेलमा मात्रै पराजित हुन पुगेको छ । ७ खेलको नतिजा विहिन छ ।