एजेन्सी – एकदिवसिय विश्वकप क्रिकेट प्रतियोगितामा श्रीलंकाबीरुद्ध दक्षिण अफ्रिकाले पहिला फिल्डिङ गर्ने निर्णय लिएको छ ।

भर्खर सम्पन्न टसमा दक्षिण अफ्रिका कप्तान फाफ डु प्लेसिसले टस जितेर पहिला फिल्डिङ गर्ने निर्णय लिएका हुन् । आजको खेलमा दक्षिण अफ्रिकाले दुई खेलाडी परिवर्तन गरेको छ । लुन्गी निडी र डेविड मिलरको स्थानमा जेपी ड्युमिनी र ड्वाइन प्रीटोरियसलाई मौका दिएको छ । श्रीलंकाले भने एक खेलाडी परिवर्तन गरेको छ । नुवान प्रदीपको स्थानमा सुरुङ्गा लकमललाई मौका दिएको छ ।

दक्षिण अफ्रिकाको प्लेइङ ११ : क्विन्टन डी कक, हसिम हमला, फाफ डु प्लेसिस(कप्तान), एडेन मार्कराम, रस्सि भान डर दुसेन, ड्वाइन प्रीटोरियस, एन्डिलो फेहलुकवलो, क्रिस मोरिस, कागिसो रबाडा, जेपी ड्युमिनी, इमरान ताहिर ।

श्रीलंकाको प्लेइङ ११ : दिमुथ करुणारत्ने(कप्तान),कुशल परेरा,अविष्का फर्नान्डो,कुशल मेन्डिस,एन्जिलो मेथ्युज,धनञ्जय डी शिल्भा,थिसेरा परेरा,जीवन मेन्डिस,इसरु उडना,लासिथ मलिंगा र सुरुङ्गा लकमल ।

७ खेलमा १ मा जित र ५ मा हारका साथ नवौं स्थानमा रहेको दक्षिण अफ्रिका उपाधि होडबाट बाहिरिसकेको छ । उसको लागि आजको खेल प्रतिष्ठाको लडाईंमात्रै हुने छ ।

यता ६ खेलमा समान २ मा जित र हारका साथ सातौं स्थानमा रहेको श्रीलंकाको भने शीर्ष चारमा रहेर सेमिफाइनल खेल्ने झिनो अंक गणितीय संभावना बाँकी छ । आज सहित बाँकी दुबै खेलमा विजयी भए र अन्य टोलीको नतिजा आफुअनुकुल आएको खण्डमा श्रीलंका सेमिफाइनलमा पुग्न सक्ने अंक गणितीय झिनो संभावना देखिन्छ । आजको खेलमा पराजित भए श्रीलंकाको पनि अघिल्लो चरणको यात्रा लगभग समाप्त हुने छ ।

यसअघि उपाधिको प्रमुख दाबेदार इंग्ल्यान्डलाई स्तब्ध पारेको श्रीलंकाको मनोबल पनि उच्च छ । श्रीलंकाका लागि कप्तान दिमुथ करुणारत्ने,तीब्र गतिका बलर लाथिस मलिङ्गा र कुशल परेरा प्रमुख हतियार हुन् । मिडिल अडरका ब्याट्सम्यानको खराब प्रर्दशनले श्रीलंका भने केहि समस्यामा देखिन्छ ।

यता आसा गरेभन्दा खराब प्रर्दशन गरि रहेको दक्षिण अफ्रिका लागि ओपनर क्विन्टन डी कक,कप्तान फाफ डु प्लेसिस र स्पिनर इमरान ताहिरको प्रर्दशन अफ्रिकाको लागि महत्वपूर्ण हुने छ । तीब्र गतिका बलर कागिसो रबडाको खराब प्रर्दशन अफ्रिकाको लागि ठूलो चिन्ताको विषय हो ।

विश्वकपमा यी दुई देशबीच ५ खेल भएको छ । जसमा दक्षिण अफ्रिका ३ खेलमा विजयी हुँदा १ मा पराजित भएको छ । एक खेल बराबरीमा सकिएको छ । यी दुई देशबीच ७६ वान डे खेल भएको छ । जसमा दक्षिण अफ्रिका ४३ खेलमा विजयी हुँदा ३१ खेलमा पराजित भएको छ । २ खेलको नतिजा विहिन छ ।