एजेन्सी – एकदिवसिय विश्वकप क्रिकेट प्रतियोगिता अन्तर्गत बिहीबारको खेलमा भारतले वेस्ट इन्डिजलाई २ सय ६९ रनको मध्यम लक्ष्य दिएको छ ।

म्यानचेस्टरमा टस जितेर पहिला ब्याटिङ गर्ने निर्णय लिएको भारतले निर्धारित ५० ओभरमा ७ विकेटको क्षतिमा २ सय ६८ रन बनायो । भारतका लागि कप्तान विराट कोहलीले सर्वाधिक ७२ रनको योगदान दिए । ३९ ओभरको दोस्रो बलमा क्याच आउट हुनुअघि कोहलीले ८२ बलमा ८ चौका प्रहार गरे ।

भारतले पहिलो विकेटका रुपमा ओपनर रोहित शर्मालाई १८ रनमा गुमाएको थियो । केमर रोचको छैटौं ओभरको अन्तिम बलमा कटविहाइन्ड निकाल्दै शाई होपबाट क्याच गराउँदै पेभिलिएन फर्काए । सुरुवाती समय एम्पारले आउट नदिएपनि कप्तान जोसन होल्डरले रिब्यु लिदै रोहितलाई पेभिलिएनको बाटो देखाए ।

२१ ओभरको चौथो बलमा होल्डरले अर्का ओपनर केएल राहुललाई ४८ रनमा बोल्ड आउट गरे । राहुलले ६४ बलमा ६ चौका प्रहार गरे । २७ ओभरको पहिलो बलमा विजय शंकर १४ रनमा क्याच आउट भए । केदार जाधव ७ रनमा क्याच आउट भएपछि भारत दबाबमा परेको थियो ।

छैटौं विकेटका लागि महेन्द्र सिंह धोनी र हार्दिक पान्ड्याले ७० रनको साझेदारी गर्दै भारतको इनिङ उकासे । धोनी ६१ बलमा ३ चौका र २ छक्का सहित ५६ रनमा अविजित रहे । हार्दिकले ३८ बलमा ५ चौका सहित ४६ रनको योगदान दिए । वेस्ट इन्डिजका लागि केमर रोचले १० ओभरमा ३६ रन खर्चेर ३ विकेट हात पारे । त्यस्तै कप्तान जोसन होल्डर र शिल्डन कर्टेलको नाममा समान २ विकेट रह्यो ।