बैंगलोर (एजेन्सी)- एबी डि भिलियर्सको उत्कृष्ट प्रदर्शनबाट प्रेरित रोयल च्यालेन्जर्स बैंगलोर इन्डियन प्रिमियर लिग (आइपिएल)को फाइनलमा पुगेको छ । आइपिएलको पहिलो प्ले अफमा गुजरात लायन्सलाई ४ विकेटले हराउँदै बैंगलोर फाइनल पुगेको हो ।

छक्का प्रहार गर्दै बैंगलोरका एबी डि भिलियर्स ।

उच्च फर्ममा रहेको कप्तान विराट कोहलीलगायत माथ्थिलो क्रमका ब्याट्सम्यान सस्तैमा आउट भएपछि डि भिलियर्सले एक्लै मोर्चा सम्हालेका थिए । बैंगलोरले एक समय २९ रनमा ५ विकेट गुमाइसकेको थियो । ४७ बलमा डि भिलियसले अविजित ७९ रन बनाएपछि १ सय ५९ रनको लक्ष्य पछ्याएको बैंगलोरले १० बल अघि ६ विकेट गुमाएर प्राप्त गरेको थियो । म्यान अफ दि म्याच डि भिलियर्सले ५ चौका र त्यतिनै छक्का प्रहार गरेका थिए । उनको तारिफ गर्दै कप्तान कोहलीले दबाबका बीच गरेको प्रदर्शनले टोलीको मनोबललाई उच्च बनाएको छ । तल्लो क्रमका स्टुआर्ट बिन्नी र अन्त्यमा इक्वाल अब्दुल्लाले डि भिलियर्सलाई साथ दिएकाथिए । अब्दुल्ला ३३ रनमा अविजित रहे भने बिन्नीले २१ रन बनाए । त्यसबाहेक कुनै ब्याट्सम्यानले दोहोरो आकँडा बनाएनन् । कोहलीले खाता खोल्न सकेनन् भने क्रिस गेल ९, लोकेश राहुल शूनय, सेन वाट्सन १ र सचिन बेबी शून्य रनमा आउट भए । कोहली र गेललाई बोल्ड गरेका गुजराजका धवल कुलकर्णीले राहुल र बेबीको विकेट पनि लिएका थिए । उनले ४ विकेटका लागि ४ ओभरमा मात्र १४ रन दिएका थिए । बाँकी २ विकेट रविन्द्र जडेजाले लिए ।
त्यसअघि टस हारेर पहिलो ब्याटिडको निम्तो पाएको गुजरातले निर्धारित २० ओभरमा सबै विकेट गुमाएर १ सय ५८ रन बनाएको थियो । ड्वाने स्मिथले अर्धशक बनाएपछि टोलीले डेढसयको आकडा पार गरेको थियो । ब्राभोले ४१ बलमा ५ चौका र ६ छक्कामा ७३ रन बनाए । दिनेश कार्तिकले २६, एकलव्य दुवेदीले १९ र कुलकर्णीले १० रन बनाए । बैंगलोरका वाट्सनले ४, क्रिस जोर्डनले २ र युजबेन्द्र चाहालाले १ विकेट लिए ।
आइपिएलको दोस्रो प्ले अफमा बुधबार कोलकाता नाइट राइडर्स र सनराइजर्स हैदराबादबीच प्रतिस्पधा हुनेछ ।