एजेन्सी – एकदिवसिय विश्वकप क्रिकेट प्रतियोगिता अन्तर्गत आइतबारको खेलमा पाकिस्तानले दक्षिण अफ्रिकालाई ३ सय ९ रनको लक्ष्य दिएको छ ।

लर्ड्समा टस जितेर पहिला ब्याटिङ थालेको पाकिस्तानले निर्धारित ५० ओभरमा ७ विकेटको क्षतिमा ३ सय ८ रन बनायो । पाकिस्तानका लागि मध्यक्रमका ब्याट्सम्यान ह्यारिस सोहेलले आक्रमक ब्याटिङ गर्दै ८९ रनको महत्वपूर्ण योगदान दिए । विशाल योगफल सम्म पुर्याउन उत्कृष्ट प्रर्दशन गरेका सोहेल अन्तिम ओभरको पाँचौ बलमा विकेटकीपर क्विन्ट डी ककबाट क्याच आउट हुनुअघि ५९ बलमा ९ चौका र ३ छक्का प्रहार गरे ।

पाकिस्तानलाई ओपनर फकार जमान र इमाम उल हकले ८१ रनको साझेदारी गर्दै राम्रो सुरुवात दिएका थिए । यी दुईबीचको साझेदारी १५ ओभरको पाँचौ बलमा इमरान ताहिरले फकार जमानलाई ४४ रनमा हासिम अमलाबाट क्याच गराउँदै तोडे । जमानले ५० बलमा ६ चौका र १ छक्का प्रहार गरे । अर्का ओपनर हकलाई पनि ताहिले २१ ओभरको तेस्रो बलमा आफैं क्याच लिदै ४४ रनमा पेभिलिएनको बाटो देखाए । उनले ५७ बलमा ६ चौका प्रहार गरे । मोहम्मद हफिजलाई एडेन मार्करामले २० रनमा एलवी डब्लू आउट गरे ।

शीर्षक्रमका बाबर आजमले उत्कृष्ट प्रर्दशन गर्दै ८० बलमा ७ चौका सहित ६९ रनको योगदान दिए । बाबरले चौथो विकेटका लागि सोहेलसँग ८१ रनको साझेदारी गरेका थिए । तल्लोक्रमका इमाद वासिमले १५ बलमा ३ चौका सहित २३,वहाब रियाजले ४ रन बटुले ।

दक्षिण अफ्रिकाका लागि लुन्गी निडीले ९ ओभरमा ६४ रन खर्चेर ३ विकेट हात पारे । त्यस्तै इमरान ताहिरले २,एडेन मार्कराम र एन्डिलो फहवकुवलोको नाममा समान १ विकेट रह्यो ।