काठमाडौं (हाम्रो खेलकुद) – एसीसी यू-१९ इस्टर्न रिजन प्रतियोगिताको तयारीमा रहेको नेपाली यू१९ राष्ट्रिय क्रिकेट टोली अभ्यासको लागि भारत नजाने भएको छ । नेपाली टोलीले एसीसीलाई भारत भ्रमणको प्रस्ताव पठाएपनि आजसम्म कुनै जवाफ नआएपछि नजाने भएको हो ।

यू१९ का प्रशिक्षक विनोद दासले नेपाली यू१९ टोली भारत भ्रमणमा नजाने बताएका छन् । प्रस्ताव अनुसार नेपाली यू१९ टोली भारतको बेंगलोरका स्टेट स्तरका खेलाडीसँग तीन चार अभ्यास खेल खेल्न पठाएको थियो । तर आजसम्म कुनै जवाफ नआएपछि नेपाली यू१९ टोली भारत भ्रमणमा नजाने प्रशिक्षक विनोद दासले हाम्रो खेलकुदलाई जानकारी दिए ।

‘अब हामी भारत जादैनौं । समय पनि छैन । बरु हामी एसीसीसँग कुरा गरेर मिले सम्म चार पाँच दिन अगाडीनै मलेसिया जाने सोचमा छौं’,प्रशिक्षक दासले हाम्रो खेलकुदसँग भने ।

विश्वकप चलिरहेको अवस्थामा भारतीय क्रिकेट कन्टोल बोर्ड (बीसीसीआई) व्यस्त हुँदा नेपालको प्रस्तावमा कुनै आधिकारीक धारणा नआएको हुनसक्ने दासको बुझाई छ । नेपालले एसीसीलाई भारतमा अभ्यास खेल्ने प्रस्ताब पठाएको थियो । एसीसीले बिसीसीआईसँग अनुमति लिनुपर्ने हुन्छ । तर नेपालको प्रस्तावमा कुनै जवाफ नआएपछि भारत भ्रमण नहुने पक्का भएको हो । मलेसिया चारपाँच दिन अघि नजाने भए नेपाल असार १५ मा मलेसिया प्रस्थान गर्ने कार्यक्रम रहेको छ ।

नेपाली यू१९ को बन्द प्रशिक्षणमा २४ जना खेलाडीले अभ्यास गरि रहेका छन् । मलेसियामा ३० जुन देखि १० जुलाई सम्म चल्ने प्रतियोगितामा समुह ए मा नेपालसँगै सिंगापुर, म्यानमार र चीन छन् । त्यस्तै समुह बी मा हङकङ, थाईल्यान्ड, भुटान र आयोजक मलेसिया छन् । यस प्रतियोगिताको विजेता टोलीले २८ अगस्ट देखी ८ सेप्टेम्बरसम्म श्रीलंकामा हुने एसिया कप खेल्न पाउने छ । प्रतिस्पर्धीहरु हेर्दा नेपाल यस प्रतियोगिताको प्रमुख दाबेदार टोली मानिन्छ ।

यस प्रतियोगिताको विजेतासँगै भारत,पाकिस्तान,बंगलादेश,अफगानिस्तान,यूएई र कुवेतले एसिया कपमा प्रतिस्पर्धा गर्ने छन् । नेपालले पहिलो खेल जुलाई २ मा म्यानमारसँग खेल्ने छ । त्यस्तै ५ जुलाईमा सिंगापुर,६ जुलाईमा चीनसँग प्रतिस्पर्धा गर्ने छ । दुवै समूहका शीर्ष दुई टोलीले जुन ८ मा हुने सेमिफाइनलमा प्रतिस्पर्धा गर्नेछन् । फाइनलमा ९ जुलाईमा हुने छ । नेपालले यस प्रतियोगिताको लागि छिट्टै टोली घोषणा गर्नेछ ।