एजेन्सी – घरेलु टोली नेदरल्यान्ड्सले टेष्ट राष्ट्र जिम्बाबेसँगको दुई ओडीआई सिरिज जितेको छ । शुक्रबार राती दोस्रो खेलमा जिम्बाबेलाई ३ विकेटले पराजित गर्दै श्रृंखला २–० ले जितेको हो ।

२ सय ९१ रनको लक्ष्य नेदरल्यान्ड्सले ४ बल अगावै ७ विकेटको क्षतिमा पुरा गर्यो । वान डे क्रिकेटमा नेदरल्यान्ड्सले पछ्याएको यो हालसम्मकै उच्च योगफल समेत हो । नेदरल्यान्ड्सका लागि म्याक्स ओडोअडले ८१ बलमा ३ चौका र १ छक्का सहित ५९ रनको योगदान दिए । त्यस्तै ओपनर टोबिएस भिस्सीले ३३ बलमा ६ चौका र २ छक्का सहित ४१, बेन कुपर २०, वेस्ली बरेसीले २२ रन जोडे ।

तल्लोक्रमका रोलोफ भान डर मर्वेले ५४ बलमा ५ चौका र १ छक्का सहित ५७ तथा कप्तान पिटर सेलारले १५ बलमा ५ चौका र १ छक्का सहित ३२ रन जोडेपछि नेदरल्यान्ड्सको जित पक्का बनेको थियो । विकेटकीपर स्कर्ट एडवड्स ४४ रनमा अविजित रहे । जिम्बावेका लागि सन विलियम्सले ७ ओभरमा १ मेडन सहित ४३ रन खर्चेर ४ विकेट लिएपनि टोलीको हार टार्न सकेनन् । त्यस्तै डोनाल्ड त्रिपनो २ र टेन्डाइ चतराको १ विकेट रह्यो ।

त्यसअघि टस जितेर पहिला ब्याटिङ थालेको जिम्बावेले  निर्धारित ५० ओभरमा ६ विकेट गुमाउँदै २ सय ९० रन जोडेको थियो । जिम्बावेका लागि सिकन्दर राजा ६८ बलमा समान ५ चौका र छक्का सहित ८५ रनमा अविजित रहेपनि त्यो जितको लागि काम लागेन । त्यस्तै क्रेग इर्विनले १ सय ७ बलमा ८ चौका र ३ छक्का सहित ८४ रनको योगदान दिए ।

विकेटकीपर बेन्डम टेलर ५१,सोलोमन मिर २८,डोनाल्ड त्रिपनो १६ र पिटर मुरले रन बटुले । नेदरल्यान्ड्सका लागि फ्रद क्लासेनले सर्वाधिक २ विकेट हात पारे । पहिलो खेलमा नेदरल्यान्ड्सले जिम्बाबेलाई ७ विकेटले पराजित गरेको थियो । नेदरल्यान्ड्स र जिम्बाबेबीच थप दुई टी ट्वान्ट खेल हुने छ । पहिलो टी ट्वान्टी आइतबार खेल्ने छ ।