एजेन्सी – एकदिवसिय विश्वकप क्रिकेट प्रतियोगितामा आज अष्ट्रेलिया र बंगलादेश भिड्दै छन् । खेल नेपाली समय अनुसार ३:१५ देखी सुरु हुने छ । ५ खेलमा ४ मा जित र १ मा हारका साथ तेस्रो स्थानमा रहेको अष्टेलिया आजको खेलमा विजयी भए शीर्षस्थानमा उक्लिने छ ।

बंगलादेशले सुरुवाती ५ खेलमा समान २ मा जित र हारका साथ पाँचौ स्थानमा छ । सेमिफाईनल खेल्ने यात्रा बलियो बनाउन बंगलादेशलाई आजको खेल जित्नु पर्ने दबाव छ ।

विश्वकपमा हालसम्म अष्टेलियाले बंगलादेशसँग हारेको छैन । विश्वकपका यी दुई देशबीच तीन खेल हुँदा अष्टेलिया २ खेलमा विजयी भएको छ । १ खेलको नतिजा विहिन छ । आजको खेलमा प्रभाव पार्न सक्ने २ खेलाडी :

सकिब अल हसन (बंगलादेश)

बंगलादेश क्रिकेट इतिहासकै सर्वाधिक सफल क्रिकेटर तथा अलराउण्डर सकिब अल हसनले यस विश्वकपमा उत्कृष्ट प्रर्दशन गर्दै सर्वाधिक रन बनाउने खेलाडीको सुचिमा शीर्ष स्थानमा छन् । सुरुवाती ४ खेलमा २ शतक र २ अर्ध शतक सहित कुल ३ सय ८४ रन जोडेका छन् । अलराउण्डर सकिबले ४ खेलमा ५ विकेट पनि लिएका छन् । सकिबले दक्षिण अफ्रिकासँगको पहिलो खेलमा ७५ रन बनाउनुको साथै १ विकेट लिएका थिए । न्युजिल्यान्डसँगको खेलमा २ विकेट लिदै ६४ रन जाडेपनि टोलीको हार टार्न सकेनन् । इंग्ल्यान्डसँगको खेलमा १ सय २१ रनको शतकीय इनिङ पनि खेर गएको थियो । वेस्ट इन्डिजसँगको खेलमा १ सय २४ रनमा अविजित रहनुको साथै २ विकेट लिदै सहज जित पक्का गरेका थिए ।

सकिबले २ सय २ वान डे खेलमा ९ शतक र ४४ अर्ध शतक प्रहार सहित ६ हजार १ सय १ रन बटुलि सकेका छन् । त्यस्तै बलिङतर्फ २ सय ५४ विकेट लिएका छन् । सकिबको उत्कृष्ट अलराउण्डर प्रर्दशनमा बंगलादेशले आजको खेलमा आश्चर्यजनक नतिजा निकाल्न सक्छ ।

मिचेल स्टार्क (अष्टेलिया)

तीब्र गतिका बलर मिचेल स्टार्कले आफ्नो एक्लो प्रर्दशनमा टोलीको जित पक्का गर्न सक्ने क्षमता राख्दछन् । डेथ ओभर र पावर प्लेमा उत्कृष्ट प्रर्दशन गर्ने स्टार्कको कतिपय ब्याट्सम्यानले उनको बलिङको गति पत्तोनै पाउन सक्दैनन । स्वीङ गराउन माहिर स्टार्कले तल्लोक्रममा ठूला शट प्रहार गर्ने क्षमता पनि राख्छन् ।

अष्टेलियाले सन् २०१५ को विश्वकप जिताउन २२ विकेट लिँदै म्यान अफ द सिरिज चुनिका स्टार्कले यस विश्वकपमा पनि सुरुवाती खेलमा उत्कृष्ट प्रर्दशन गर्दै १३ विकेट लिई सकेका छन् । अफगानिस्तानसँग १ विकेट लिएका स्टार्कले वेस्ट इन्डिजसँगको खेलमा ५ विकेट लिदै टोलीको जित पक्का गरेका थिए । भारतसँग १ विकेटका स्टार्कले पाकिस्तानसँग २ विकेट हात पारे । श्रीलंकासँगको खेलमा ४ विकेट लिएका थिए । स्टार्कले मात्र ८० वान डे खेलमा १ सय ५८ विकेट लिई सकेका छन् । जसमा वेस्ट प्रर्दशन ६-२८ छ ।उत्कृष्ट लयमा रहेका स्टार्क आज चम्किए अष्ट्रेलियाले सहज जित निकाल्न सक्छ ।