एजेन्सी – एकदिवसिय विश्वकप क्रिकेट प्रतियोगितामा आज साबिक विजेता अष्ट्रेलिया र बंगलादेश भिड्दै छन् । खेल नेपाली समय अनुसार ३:१५ देखी सुरु हुने छ ।

अष्ट्रेलिया पाँचौ र बंगलादेश तेस्रो जितको खेजिमा छन् । अष्ट्रेलिया आजको खेलमा विजयी भए न्युजिल्यान्ड र इंग्ल्यान्डलाई पछि पार्दै अंक तालिकामा शीर्षस्थानमा उक्लिने छ । अष्ट्रेलिया ५ खेलमा ४ मा जित र १ मा हारका साथ तेस्रो स्थानमा छ । यता बंगलादेश अष्ट्रेलियालाई स्तब्ध पार्दै सेमिफाईनल खेल्ने यात्रा बलियो बनाउन चाहान्छ । बंगलादेशले सुरुवाती ५ खेलमा समान २ मा जित र हारका साथ पाँचौ स्थानमा छ ।

यसअघि वेस्ट इन्डिजले प्रस्तुत गरेको ३ सय २२ रनको विशाल लक्ष्य सहजै पुरा गरेको बंगलादेशको असली अग्नि परिक्षा अष्ट्रेलियासँग हुने छ । त्यस्तै खेलमा उत्कृष्ट शतक प्रहार गरेका सकिब अल हसन अष्ट्रेलियाका लागि घातक बन्न सक्छन् । सकिबले जारी विश्वकपमा ४ खेलमा २ शतक र २ अर्ध शतक सहित कुल ३ सय ८४ रन जोड्दै सर्वाधिक रन बनाउने खेलाडीको सुचिमा शीर्षस्थानमा छन् । अष्ट्रेलियामाथि आश्चर्यजनक नतिजा निकाल्न सकिबको प्रर्दशन निर्णायक बन्न सक्छ ।

विश्वकपमा हालसम्म अष्ट्रेलियाले बंगलादेशसँग हारेको छैन । विश्वकपका यी दुई देशबीच तीन खेल हुँदा अष्ट्रेलिया २ खेलमा विजयी भएको छ । १ खेल नतिजा विहिन छ । आजको खेलमा अष्ट्रेलियन अलराउन्डर मार्कस स्टोइनिस टोलीमा फर्किन सक्ने सम्भावना छ । उनी भारतसँगको खेलमा घाईते हुँदा श्रीलंका र पाकिस्तानसँगको खेल गुमाएका थिए ।

कप्तान आरोन फिन्च, डेविड वार्नर, स्टिभ स्मिथ, मिचेल स्टार्क, प्याट कमिन्स, ग्लेन म्याक्सवेलको उत्कृष्ट प्रर्दशनमा अष्ट्रेलियाले बंगलादेशमाथि सहज जित निकाल्न सक्छ । सकिबसँगै मुश्फिकुर रहिम, तामिम इकवाल, लिटन दास, मुस्ताफिजुर रहमानको प्रर्दशन बंगलादेशका लागि निकै महत्त्वपूर्ण हुनेछ ।