एजेन्सी – घरेलु टोली नेदरल्यान्ड्सले दुई खेलको वान डे सिरिज अन्तर्गत पहिलो खेलमा टेष्ट राष्ट्र जिम्बावेलाई डक अर्थ लेविसका आधारमा ७ विकेटले पराजित गरेको छ ।

बुधबार राती सम्पन्न खेलमा जिम्बाबेलाई स्तब्ध पार्दै नेदरल्यान्ड्सले दुई खेलको वान डे सिरिजमा १– ० को अग्रता लिएको छ । २ सय ६ रनको मध्यम लक्ष्य नेदरल्यान्ड्सले ४२.४ बलमा ३ विकेट गुमाउँदै पुरा गरेको हो । नेदरल्यान्ड्सको जितमा यसै खेलबाट ओडीआईमा डेब्यू गरेका युवा खेलाडी म्यास ओडोवडले १ सय १८ बलमा ९ चौका प्रहार गर्दै ८२ रनमा अविजित रहँदै जित पक्का गरे ।

त्यस्तै बेन कुपरले ५५ बलमा ५ चौका र १ छक्का सहित ३५ रनको योगदान दिए । ओपनर टोयिबास भिसीले २८ रनमा आउट हुँदा वेस्ले बर्रेसीले ४७ बलमा ४ चौका र १ छक्का सहित ३९ रनमा अविजित रहे । जिम्बाबेका लागि सेन विलियमस २ र आइन्स्ले नाडालोभुले १ विकेट लिन बाहेक अन्य कुनै पनि बलरले विकेट लिन सकेनन् ।

त्यसअघि पाहुना टोली जिम्बाबेले टस जितेर पहिला ब्याटिङ थाल्दै निर्धारित ४७ ओभरमा ८ विकेटको क्षतिमा २ सय ५ रन जोडेको थियो । जिम्बाब्बेका लागि विकेटकीपर बे्रन्डन टेलरले सर्वाधिक ७१ रनको योगदान दिए । कप्तान पिटर सेल्सरले बोल्ड आउट गर्नुअघि टेलरले ८५ बलमा ७ चौका र २ छक्का प्रहार गरे । अन्य ब्याट्सम्यानले भने राम्रो प्रर्दशन गर्न सकेनन् ।

कायल जर्विस ३२, डोनाल्ड त्रिर्पोनो २१, सन विलियम्स र क्रेग इर्किनले समान १६ तथा सिकन्दर राजाले ११ रन बटुले । नेदरल्यान्ड्सका लागि फे्रड क्लासेन,पिटर सेल्सर र पल भानले समान २ विकेट लिए । दोस्रो तथा अन्तिम वान डे खेल आगमी शुक्रबार खेल्ने छ । नेदरल्यान्ड्स र जिम्बाबेबीच दुई टी ट्वान्टी खेल समेत हुने छ ।