एजेन्सी – मंगलबार राती सम्पन्न एकदिवसिय विश्वकप क्रिकेटमा अन्तर्गत इंग्ल्यान्ड र अफगानिस्तानबीचको खेलमा थुप्रै रेकर्ड बनेका छन् ।

पहिला टस जितेर ब्याटिङ थालेको इंग्ल्यान्डले निर्धारित ५० ओभरमा ६ विकेटको क्षतिमा ३ सय ९७ रन बनाएको थियो । ३ सय ९८ रनको विशाल लक्ष्य पछ्याएको अफगानिस्तानले निर्धारित ५० ओभरमा ८ विकेटको क्षतिमा २ सय ४७ रन बनायो । इंग्ल्यान्डले अफगानिस्तानलाई १ सय ५० रनको अन्तरले पराजित गरेको थियो । यी दुई देशबीचको खेलमा केहि राम्रा र नराम्रा ५ विश्व रेकर्ड बनेका छन् ।

१. इओन मोर्गनको १७ छक्का

अफगानिस्तानविरुद्ध रनको पहाड बनाउन कप्तान इओन मार्गनले ७१ बलमा १७ छक्का र ४ चौका सहित १ सय ४८ रन बनाएका थिए । जुन विश्वकप र वान डे क्रिकेटकै एकै ब्याट्सम्यानले एकै खेलमा प्रहार गरेको सर्वाधिक छक्का हो । यसअघि सन् २०१५ को विश्वकपमा क्रिस गेलले जिम्बाबेविरुद्ध १६ छक्का प्रहार गरेका थिए । त्यस्तै वान डे क्रिकेटमा गेलसँगै, रोहित शर्मा र एबी डि भिलियर्सको नाममा पनि १६ छक्का रहेको थियो । जुन मोर्गनले तोडे ।

२. विश्वकपमा महँगो बलर राशिद

एक दिवसिय विश्वकप क्रिकेटमा एकै खेलमा सर्वाधिक रन खर्चने बलर अफगानिस्तानका लेग स्पिनर राशिद खान बनेका छन् । राशिदले ९ ओभरमा १ सय १० रन खर्चिदा कुनै विकेट लिन सकेनन् । वान डे क्रिकेट इतिहासमा भने सर्वाधिक महँगो बलर अष्ट्रेलिया मिक लुईसले १० ओभरमा १ सय १३ रन खर्चेका छन् ।

३. एकै बलरलाई ११ छक्का

स्पिनर राशिद खानको नाममा अर्को पनि खराब विश्व रेकर्ड बन्न पुग्यो । राशिदले १ सय १० रन खर्चिदा कुल ११ छक्का खाए । जुन वान डे क्रिकेटमा एकै बलरले एकै इनिङमा खर्चेको सर्वाधिक छक्का हो ।

४. एकै इनिङमा २५ छक्का (इंग्ल्यान्ड)

इंग्ल्यान्डले एकै खेलमा सर्वाधिक छक्का प्रहार गर्ने टिम बनेको छ । रनको पहाड बनाउन इंग्ल्यान्डका ब्याट्सम्यानले कुल २५ छक्का प्रहार गरे । जुन एकै इनिङमा बनेको सर्वाधिक छक्का समेत हो । इंग्ल्यान्डले आफ्नै रेकर्ड तोडेको हो । यस अघि गत फ्रेवुअरीमा इंग्ल्यान्डले वेस्ट इन्डिजसँगको खेलमा २४ छक्का प्रहार गरेको थियो । इंग्ल्यान्डका इओन मोर्गनले १७,मोइन अलीले ४,जोनी बेयरस्टो ३ र जो रुटले १ छक्का प्रहार गर्दा कुल २५ छक्का प्रहार भएका थिए ।

५. एकै खेलमा ३३ छक्का

इंग्ल्यान्ड र अफगानिस्तानबीचको खेलमा कुल ३३ छक्का प्रहार भए । जुन विश्वकपमा एकै खेलमा सर्वाधिक छक्का समेत हो । इंग्ल्यान्डको ब्याट्सम्यानले २५ र अफगानिस्तानतर्फबाट ८ छक्का प्रहार भएको थियो । यसअघि विश्वकपमा सन् २०१५ मा न्युजिल्यान्ड र वेस्ट इन्डिजको खेलमा कुल ३१ छक्का प्रहार भएको थियो ।