एजेन्सी – इंग्ल्यान्ड र वेल्समा जारी एकदिवसिय विश्वकप क्रिकेट प्रतियोगितामा बुधबार दक्षिण अफ्रिका र न्युजिल्यान्डबीच प्रतिस्र्धा हुँदै छ । खेल नेपाली समय अनुसार दिउँसो ३:१५ देखी सुरु हुनेछ ।

दक्षिण अफ्रिका गर वा मरको अवस्थामा छ । शीर्ष चारमा रहेर सेमिफाइनल खेल्ने आसा जिवितै राख्न दक्षिण अफ्रिकालाई जित्नै पर्ने दबाब छ । न्युजिल्यान्ड ४ खेलमा ३ मा जित सहित ७ अंक बटुल्दै तेस्रो स्थानमा छ । आजको खेलमा विजयी भए न्युजिल्यान्ड शीर्षस्थानमा उक्लिदै सेमिफाइनल खेल्ने यात्रा बलियो बनाउने छ । शीर्षस्थानमा रहेको इंग्ल्यान्डले ५ खेलमा ४ मा जित र १ मा हारका साथ ८ अंक जोडेको छ ।

न्युजिल्यान्डले श्रीलंकालाई १० विकेट,बंगलादेशलाई २ र अफगानिस्तानलाई ७ विकेटले हराएको थियो । भारतसँगको खेलमा भने वर्षाको कारण अंक बाँडेको थियो । दक्षिण अफ्रिका ५ खेलमा १ मा जित, ३ मा हार र १ खेलमा अंक बाड्दै ३ अंकका साथ आठौं स्थानमा छ ।

न्युजिल्यान्डका कप्तान केन विलियम्सन, ट्रेन्ट बोल्ट, जेम्श निशम, म्याट हेनरी, ल्योकी फ्ग्र्युसन, मार्टिन गुप्टिल र रोश टेलर उत्कृष्ट लयमा छन् । बंगलादेशसँगको खेलमा घाईते भएका तीब्र गतिका बलर लुन्गी निडीले टोलीमा पुनरागमन गर्ने छन् । उनको आगमनले दक्षिण अफ्रिका तीव्र गतिको बलिङ लाइन थप बलियो बन्न सक्छ ।

दक्षिण अफ्रिका लागि ओपनर क्विन्टन डी कक, कप्तान फाफ डु प्लेसिस, इमरान ताहिर, कागिसो रबाडा प्रमुख हतियार हुन् । विश्वकपमा यी दुई देश ७ पटक भिडेका छन् । जसमा न्युजिल्यान्ड ५ पटक विजयी हुँदा २ खेलमा पराजित भएको छ ।

यी दुुई देशबीच ७० ओडीआई खेल भएको छ । जसमा दक्षिण अफ्रिका ४१ खेलमा विजयी हुँदा २४ खेलमा पराजित भएको छ । ५ खेल नतिजा विहिन छ । सन् २०१५ को विश्वकपमा न्युजिल्यान्डले दक्षिण अफ्रिकालाई डक वर्थ लेविसका आधारमा ४ विकेटले पराजित गर्दै फाईनलमा प्रवेश गरेको थियो ।