काठमाडौं (हाम्रो खेलकुद) – नेपाली राष्ट्रिय टोलीका युवा ब्याट्सम्यान तथा यू१९ टोलीका कप्तान रोहित कुमार पौडेलले यस पटक विश्वकप छनोटको गल्ति दोहोरिन नदिने बताएका छन् ।

नेपाली यु-१९ टोलीले यसै महिना मलेसियामा हुने एसीसी इस्टर्न रिजन यू१९ प्रतियोगिताको लागि टीयू क्रिकेट मैदानमा अभ्यासका क्रममा रोहितले यस्तो बताएका हुन् । ‘एक महिनाअघि राम्रो प्रर्दशन गर्दा पनि विश्वकप छनोट हुन सकेनौं । यूएईसँगको खेलमा हाम्रा केहि कमजोरीहरु रहे । सबैले त्यसबाट राम्रो पाठ सिकेका छन् । त्यस्तो गल्ती यसपटक दोहोरिने छैन’,रोहितले भने ।

रोहितले आफ्नो क्षमता अनुसार खेल्ने हो भने नेपालले सबै टोलीमाथि सहज जित निकाल्न सक्ने बताउँछन् । ‘नेपाल उपाधिको प्रमुख दाबेदार टोली हो । हामी उपाधि जित्दै एसिया कप खेल्ने छौं । तर कुनै पनि टोलीलाई कमजोर ठान्न हुँदैन’, रोहितले भने ।

यद्यपि रोहितले प्रशिक्षणको समय निकै कम भएको बताए । ‘१०-१५ दिनमा सबै खेलाडीले राम्रो मौका पाउन सक्दैनन् । एक डेढ महिनाको समय भएको कुन खेलाडी कस्तो खेल्थ्यो राम्रोसँग थाहा हुन्थ्यो’, रोहितले भने । एसिया कपमा टेस्ट राष्ट्रविरुद्ध राम्रो प्रर्दशन गर्न सके सिनियर टोलीसम्म पुग्न सहज हुने हुँदा सबै खेलाडी उत्कृष्ट प्रर्दशन गर्न आतुर रहेको रोहित बताउछन् ।

एक महिनाअघि विश्वकप छनोटमा अन्तिम १८ रहेका खेलाडी, प्रधानमन्त्री एकदिवसिय राष्ट्रिय क्रिकेट प्रतियोगिता तथा यू१६ टोलीमा उत्कृष्ट प्रदर्शन गर्ने खेलाडीलाई टोलीमा बोलाउँदै शुक्रबारबाट तयारी थालिएको छ ।

मलेसियामा ३० जुन देखि १० जुलाई सम्म चल्ने प्रतियोगितामा समुह ए मा नेपालसँगै सिंगापुर, म्यानमार र चीन छन् । त्यस्तै समुह बी मा हङकङ, थाईल्यान्ड, भुटान र आयोजक मलेसिया छन् । यस प्रतियोगिताको विजेता टोलीले २८ अगस्ट देखी ८ सेप्टेम्बरसम्म श्रीलंकामा हुने एसिया कप खेल्न पाउने छ । प्रतिस्पर्धीहरु हेर्दा नेपाल यस प्रतियोगिताको प्रमुख दाबेदार टोली मानिन्छ ।