काठमाडौं (हाम्रो खेलकुद) – नेपाली यू१९ राष्ट्रिय क्रिकेट टोलीले अर्को महिना मलेसियामा हुने एसीसी यू-१९ इस्टर्न रिजन प्रतियोगिताको उपाधि जित्ने लक्ष्यका साथ टीयू क्रिकेट मैदानमा तयारी थालेको छ ।

एक महिनाअघि विश्वकप छनोटमा अन्तिम १८ रहेका खेलाडी, प्रधानमन्त्री एकदिवसिय राष्ट्रिय क्रिकेट प्रतियोगिता तथा यू१६ टोलीमा उत्कृष्ट प्रदर्शन गर्ने खेलाडीलाई टोलीमा बोलाउँदै शुक्रबारबाट तयारी थालिएको छ । प्रशिक्षण कहिलेसम्म हुने भन्ने अनिश्चित छ । भारत भ्रमणमा जाने भए नेपाली टोलीले अरु एक हप्ता मात्रै प्रशिक्षण गर्ने छ । भारतमा नजाने भए नेपालले अझै २ साता टियूमै प्रशिक्षण गर्नेछ ।

मलेसियामा ३० जुन देखि १० जुलाई सम्म चल्ने प्रतियोगितामा समुह ए मा नेपालसँगै सिंगापुर, म्यानमार र चीन छन् । त्यस्तै समुह बी मा हङकङ, थाईल्यान्ड, भुटान र आयोजक मलेसिया छन् । यस प्रतियोगिताको विजेता टोलीले २८ अगस्ट देखी ८ सेप्टेम्बरसम्म श्रीलंकामा हुने एसिया कप खेल्न पाउने छ । प्रतिस्पर्धीहरु हेर्दा नेपाल यस प्रतियोगिताको प्रमुख दाबेदार टोली मानिन्छ ।

यस प्रतियोगिताको विजेतासँगै भारत,पाकिस्तान,बंगलादेश,अफगानिस्तान,यूएई र कुवेतले एसिया कपमा प्रतिस्पर्धा गर्ने छन् । बन्द प्रशिक्षणमा राष्ट्रिय टोलीबाट प्रतिनिधित्व गरि सकेका तथा यू१९ का कप्तान रोहित कुमार पौडेल, सन्दीप जोरा र पवन सरार्फ छन् । त्यस्तै घरेलु प्रतियोगितामा राम्रो प्रभाव जमाएका भिम सार्की, सागर ढकाल, राशिद खानलगायतका अनुभवी खेलाडी छन् । पीएम कपमा उदयमान खेलाडी घोषित भएका खडक बोहोरा, यू१६ का कप्तान विशाल केसी,निखिल सिंह लगायतका युवा खेलाडीले पनि बन्द प्रशिक्षणमा छन् । बन्द प्रशिक्षणमा २४ जना भन्दा बढि खेलाडी रहेका छन् ।

प्रशिक्षक विनोद दासका अनुसार उपाधि जित्दै एसिया कप खेल्ने नेपालको लक्ष्य छ । यस पटक प्रशिक्षक दास केहि नयाँ युवा खेलाडीलाई मौका दिने सोचमा छन् । ‘केहि नयाँ खेलाडीलाई मौका दिने सोचमा छु । मौका दिन उसको प्रर्दशन भने राम्रो हुनुपर्छ । कुनै पनि नयाँ खेलाडीले टोलीमा स्थान बनाउन यसअघि टोलीमा रहेका खेलाडीलाई चुनौती दिन सक्ने हुनुपर्छ’,दासले भने । ती खेलाडी दुई वर्षपछि विश्वकप छनोटलाई समेत मध्यनजर गर्दै मौका दिने सोच राखेको दास बताउँछन् ।

‘विश्वकप छनोटमा सम्रगमा राम्रो प्रर्दशन भएको हुँदा खासै परिवर्तन गर्ने ठाउँ पनि छैन । टोलीमा एक वर्षदेखी लेग स्पिनर छैनन् । यस पटक एक लेग स्पिनरलाई मौका दिन लागेका छौं,’ दास बताउँछन् । दासले अहिले टोलीमा एक विकेटकीपर साथै दुई अन्य ब्याट्सम्यान र एक लेग स्पिनर अहिले मुख्य आवश्यकता रहेको बताए ।

यू-१९ टोली अभ्यासको लागि एक हप्ता भारतको बेंगलोरमा जाने सोचमा छ । ‘हामीले अनुरोध पठाएको १० दिन जति भयो । तर यताबाट निर्णय भएको छैन । आसा छ एक दुईदिनमै निर्णय हुनेछ’ ,दासले भने । यदी अनुमती आए यू-१९ टोलीले बेंगलोरको स्टेट स्तरका खेलाडीसँग तीन चार अभ्यास खेल खेल्ने छ ।

प्रशिक्षक दास नेपाल उपाधिको दाबेदार टोली रहेको बताउँछन् । तर यू१९ टिममा खेलाडी छोटो समयमै परिवर्तन हुने हुँदा विपक्षी टोली कस्तो छ भन्ने यसै भन्न नमिल्ले दासको बुझाई छ । ‘खेलाडीको सानो कमजोरी र भाग्यले साथ नदिँदा उत्कृष्ट हुँदाहुँदै पनि विश्वकपमा छनोट हुन सकेनौं । हामी विश्वकप खेल्न लायक टोली हौं । अब यसलाई एसिया कपमा सशक्त प्रदर्शन गरेर बिर्साउनु आवश्यक छ,’ उनले टुंग्याए ।