एजेन्सी – एकदिवसिय विश्वकप क्रिकेट प्रतियोगिता अन्तर्गत शुक्रबार उपाधिको प्रमुख दाबेदार घरेलु टोली इंग्ल्यान्ड र वेस्टइन्डिज भिड्दै छन् । खेल नेपाली समय अनुसार दिउँसो ३:१५ पछि साउथह्याप्टनमा सुरु हुनेछ ।

इंग्ल्यान्ड तेस्रो र वेस्ट इन्डिज दोस्रो जितको खोजिमा छन् । वेस्ट इन्डिज र इंग्ल्यान्डबीच हालसम्म १ सय १ वान डे खेल भएको छ । जसमा इंग्ल्यान्ड ५१ खेलमा विजयी हुँदा ४४ खेलमा पराजित भएको थियो । ६ खेलको नतिजा बिहीन छ । आजको खेलमा प्रभाव पार्न सक्ने ४ खेलाडी :

जस बटलर (इंग्ल्यान्ड)

इंग्ल्यान्डका विकेटकिपर तथा विष्फोटक ब्याट्सम्यान जस बटलरले पछिल्लो दुई वर्षमा निरन्तर उत्कृष्ट प्रर्दशन गर्दै आएका छन् । बटलरले त्यहि लयलाई विश्वकपमा पनि निरन्तरता दिएका छन् । ठूला शट र आक्रमक ब्याटिङ गर्न माहिर बटलरले आफ्नो एक्लो प्रर्दशनमा टोलीको सहज जित पक्का गर्न सक्छन् । पहिलो खेलमा दक्षिण अफ्रिकाविरुद्ध १८ रनमै आउट हुन पुगेका बटलरले दोस्रो खेलमा पाकिस्तानविरुद्ध १ सय ३ रनको उत्कृष्ट शतकीय इनिङ खेलेका थिए । तर पाकिस्तानसँग इंग्ल्यान्ड स्तब्ध हुन पुग्यो । तेस्रो खेलमा आक्रमक ६४ रन जोडेका बटलरले आजको खेलमा पनि नायक बन्न सक्छन् ।

आन्द्रे रसेल (वेस्ट इन्डिज)

वेस्टइन्डिजका विश्फोटक ब्याट्सम्यान तथा अलराउण्डर आन्द्रे रसेल आजको खेल खेल्ने वा नखेल्ने अनिश्चित छ । तर पनि रसेल खेले इंग्ल्यान्डलाई सहज पक्कै हुने छैन । रसेल चोटका कारण दक्षिण अफ्रिकासँगको खेल गुमाएका थिए । कठिन जितलाई पनि सहज बनाउन सक्ने रसेलले बलिङमा पनि त्यस्तै राम्रो प्रर्दशन गर्ने गर्दछन् । रसेलले पाकिस्तानसँग २ विकेट, अष्ट्रेलियासँग खेलमा २ विकेट लिनुका साथै १५ रन जोडेका थिए । आजको खेलमा रसेल मैदान उत्रिए इंग्ल्यान्डको लागि घातक बन्न सक्छन् ।

जोफ्रा आर्चर (इंग्ल्यान्ड)

तीव्र गतिका युवा बलर जोफ्रा आर्चर आजको खेलमा पनि घातक सावित हुन सक्छन् । फ्रेन्चाइज लिगमा निरन्तर उत्कृष्ट प्रर्दशन गर्दै एक महिना अघिमात्रै इंग्ल्यान्डको टोलीमा डेब्यू गरेका आर्चरले छोटो समयमै ठूलो प्रभाव छाडेका छन् । आर्चरको आगमनले इंग्ल्यान्डको बलिङ लाईन अप समेत बलियो बन्न पुगेको छ । डेथ ओभर र पावर प्लेमा उत्कृष्ट प्रर्दशन गर्ने आर्चर योर्कर बलको लागि परिचित छन् । पहिलो खेलमा दक्षिण अफ्रिकाविरुद्ध ३ विकेट लिएका आर्चरले पाकिस्तानसँगको खेलमा भने १ विकेट मात्र लिए । बंगलादेशसँगको खेलमा भने उत्कृष्ट प्रर्दशन गर्दै ३ विकेट हात पारेका थिए । आर्चरको गती र योर्कर बलमा वेस्ट इन्डिजका ब्याट्सम्यान आज निराश बन्न सक्छन् ।

ओशेन थोमस (वेस्ट इन्डिज)

वेस्ट इन्डिजका तीव्र गति युवा बलर ओशन थोमस आजको खेलमा इंग्ल्यान्डका ब्याट्सम्यानको लागि घातक बन्न सक्छन् । पाकिस्तानलाई १ सय ५ रनमै रोक्न थोमसले घातक बलिङ गर्दै ४ विकेट लिएका थिए । अष्ट्रेलियाविरुद्ध २ विकेट लिएका उनले अफ्रिकासँगको वर्षाको कारण रद्ध हुनुअघि ३ बलमा १ रन मात्रै खर्चेका थिए ।