काठमाडौं (हाम्रो खेलकुद) – नेपाली घरेलु फ्रेन्चाइज लिगमा विदेशी खेलाडीको दबदबा हुँदा अन्य प्रतियोगितामा विभागिय खेलाडी हावी हुने गर्दछन् । शनिबार सम्पन्न तेस्रो संस्करणको प्रधानमन्त्री राष्ट्रिय एक दिवसिय क्रिकेट प्रतियोगितामा पनि सर्वाधिक रन बटुल्ने शीर्ष ५ खेलाडीमा १ मात्र प्रदेशका खेलाडी अट्न सके ।

आर्मीलाई ४ विकेटले हराउँदै पीएम कपको उपाधि पुलिसले जितेको थियो । यस संस्करणको पीएम कपमा सर्वाधिक योगफल आर्मीले ३ सय ९ बनाउँदा सबैभन्दा कम एपीएफ ४१ रनमा समेटियो । यी दुबै स्कोर सेमिफाइनलमा बने । प्रतियोगिताभर कुल ३ शतक र २१ अर्धशतक प्रहार भए । पीएम कपमा सर्वाधिक रन बनाउने ५ खेलाडी यसप्रकार छन् :

१. राजु रिजाल (आर्मी)

विकेटकीपर ब्याट्सम्यान राजु रिजाल नेपाली क्रिकेटमा नौला अनुहार होइनन् । सन् २०१६ को यू१९ विश्वकपमा नेपाली टोलीका कप्तान र सन् २०१७ मा सिनियर टोलीबाट प्रतिनिधित्व गरि सकेका युवा खेलाडी हुन् । खराब लयका कारण राष्ट्रिय टिम बाहिर रहेका राजुले यस पीएम कपमा उत्कृष्ट प्रर्दशन गर्दै सर्वाधिक रन बनाउने खेलाडी बने ।

६ खेलमा ३ अर्ध शतक सहित ४३.५० को औसतमा कुल २ सय ६१ रन बटुले । वेस्ट प्रर्दशन ९० रहँदा २७ चौका र ४ छक्का प्रहार गरे । प्रदेश २ विरुद्ध पहिलो खेलमै ९० रन बनाएका राजुले प्रदेश १ विरुद्ध ६ रनमा बटुले । कर्णालीसँगको खेलमा ६६,पुलिससँग डक र प्रदेश ३ सँगको खेलमा ५१ तथा पुलिसँगको खेलमा ३२ रन बटुले । राजुनै प्रतियोगिताका सर्वोत्कृष्ट ब्याट्सम्यान घोषित भए ।

२. अमित श्रेष्ठ (पुलिस)

नेपाली घरेलु क्रिकेटमा निरन्तर रन बटुल्दै आएका अमित श्रेष्ठले यस पीएम कपमा पनि आफ्नो लयलाई निरन्तरता दिंदै सर्वाधिक रन बनाउने खेलाडीको सुचिमा दोस्रा स्थानमा रहे । अमितले ६ खेलमा १ शतक र १ अर्ध शतक सहित कुल २ सय १० रन बटुले । औसत ३५.०० को रहँदा २६ चौका र ४ छक्का सामेल छ । अमितले कर्णाली, प्रदेश १, आर्मी, प्रदेश २, एपीएफ र आर्मीसँगको खेलमा क्रमश: ५, १०६, ४, ५०, १ र ४४ रन जोडे ।

३. रोहित कुमार पौडेल (आर्मी)

पछिल्लो एक वर्षयता सिनियर टोलीबाट पहिलो रोजाईमा खेल्दै आएका युवा ब्याट्सम्यान रोहित कुमार पौडेल पीएम कपमा सर्वाधिक रन बनाउने तेस्रो खेलाडी हुन् । रोहितले ६ खेलमा ३१.३३ को औसतमा १ अर्ध शतक सहित कुल १ सय ८८ रन जोड्दै तेस्रो स्थानमा रहे । उनले १५ चौका र ३ छक्का प्रतियोगिताभर प्रहार गरे । रोहितले प्रदेश २, प्रदेश १, कर्णाली, नेपाल पुलिस, प्रदेश ३ र पुलिसँग क्रमश: ४७, ८, ५६, १६, ४३ र १८ रन बटुले ।

४. ईशान पान्डे (प्रदेश ३)

प्रदेश टोलीबाट शीर्ष पाँचमा अट्ने ईशान पाण्डे एकमात्र ब्याट्सम्यान हुन् । ईशान पनि नेपाली टोलीमा नयाँ अनुहार होइनन् । सन् २०१६ मा नेपाली यू१९ टोलीबाट विश्वकप खेलि सकेका युवा प्रतिभा हुन् । पछिल्लो एक वर्षमा ईशानले घरेलु क्रिकेटमा राम्रो प्रर्दशन गरि रहेका छन् ।

यस पीएम कपमा ईशानले ५ खेलमा ६०.०० को औसतमा २ अर्ध शतक सहित कुल १ सय ८० रन बटुले । जसमा १४ चौका र ५ छक्का सामेल छ । ईशानले एपीएफ, प्रदेश ५, गण्डकी, सदुरपश्चिम र आर्मीसँग क्रमश: १, २१, २६, ५३ र ७९ रन जोडेका थिए । सेमिफाइनलमा उनले आर्मीविरुद्ध जोडेको ७९ रन प्रशंसायोग्य र उनको घरलु क्रिकेटकै संभवत उत्कृष्ट थियो ।

५. विनोद भण्डारी(आर्मी)

नेपाली राष्ट्रिय टोलीका हार्ड हटिर बिनोद भण्डारी ठूला शटका लागि परिचित छन् । विनोद पीएम कपमा सर्वाधिक रन बनाउने पाँचौ ब्याट्सम्यान हुन् । उनले ६ खेलमा ११९.५९ को स्टाईक रेटमा २ अर्ध शतक सहित कुुल १ सय ७७ रन बटुले । जसमा १८ चौका र ६ छक्का सामेल छ । उनले प्रदेश २, प्रदेश १, कर्णाली, पुलिस, प्रदेश ३ र पुलिसँगको खेलमा क्रमश : ६६, ३०, ५, शून्य, ७५ र १ रन जोडे ।