एजेन्सी – एकदिवसिय विश्वकप क्रिकेट प्रतियोगिता अन्तर्गत शनिवारको पहिलो खेलमा बंगलादेशले उपाधीको प्रमुख दाबेदार घरेलु टोली इंग्ल्यान्डको सामना गर्दै छ । खेल दिउँसो ३:१५ देखी सुरु हुने छ । दुबै टोली दोस्रो जितको खोजिमा छन् ।

पहिलो खेलमा दक्षिण अफ्रिकालाई १ सय ४ रनको फराकिलो अन्तरले पराजित गरेको इंग्ल्यान्डले दोस्रो खेलमा पाकिस्तानसँग १४ रनले स्तब्ध भएको थियो । त्यस्तै पहिलो खेलमा दक्षिण अफ्रिकालाईनै २१ रनले हराएको बंगलादेश दोस्रो खेलमा न्युजिल्यान्डसँग २ विकेटले पराजित भएको थियो । विश्वकपमा बंगलादेश र इंग्ल्यान्डबीच ३ खेल भएको छ । जसमा इंग्ल्यान्ड १ खेलमा विजयी हुँदा २ खेलमा पराजित भएको छ ।

सन् २०१५ को विश्वकपमा बंगलादेशसँग १५ रनले पराजित हुँदै इंग्ल्यान्ड बाहिरिनु परेको थियो । इंग्ल्यान्ड त्यस विश्वकपको बदला लिने सोचमा छ ।बंगलादेश भने त्यस्तै आश्चर्यजनक नतिजा निकाल्न चाहान्छ । पाकिस्तानसँग पराजित भएपनि जो रुट र जस बटलरले शतक प्रहार गरेका थिए । यी दुईले आजको खेलमा त्यहि लयलाई निरन्तरता दिन सक्छन् ।

ओपनर जोसन रोय, जोनी बेयरस्टो, जो रुट, कप्तान इओन मोर्गिन, जस बटलर, जोफ्रा आर्चर इंग्ल्यान्डका बलिया हतियार हुन् । बंगलादेशका अलराउण्डर सकिब अल हसन उत्कृष्ट लयमा देखिएका छन् । तामिम इकवाल, सौम्य सरकार, महमदुल्लाह, सकिब अल हसन, मुश्फिकुर रहिम, मुस्ताफिजुर रहमान बंगलादेशका प्रमुख खेलाडी हुन् ।