काठमाडौं (हाम्रो खेलकुद) – काठमाडौंमा जारी तेस्रो संस्करणको प्रधानमन्त्री राष्ट्रिय एकदिवसिय क्रिकेट प्रतियोगिताको उपाधिको लागि आज दुई विभागिय टोली त्रिभुवन आर्मी क्लव र नेपाल पुलिसबीच प्रतिस्पर्धा हुँदै छ ।

खेल बिहान ९ बजेखी कीर्तिपुर स्थित टियु क्रिकेट मैदानमा सुरु हुने छ । दुबै टोली उपाधि जित्ने लक्ष्यका साथ मैदान प्रवेश गर्ने छन् । अधिकाम्स राष्ट्रिय खेलाडी रहेका यी दुई टोलीबीच कडा प्रतिस्पर्धा हुने अनुमान गरिएको छ ।

यसअघि समुह चरणको खेलमा आर्मी पुलिससँग ५० रनले पराजित भएको थियो । पुलिस समुह चरणको नतिजा दोहोराउँदै उपाधि जित्ने धुनमा मैदान प्रवेश गर्ने छ । आर्मी समुह चरणको हारको बदला लिदै च्याम्पियन बन्ने सोचमा देखिन्छ ।

दुई वर्ष अघि पहिलो संस्करणको फाईनलमा आर्मी र पुलिस भिडेपनि वर्षाको कारण संयुक्त रुपमा च्याम्पियन बन्नु परेको थियो । पुलिस समुह बी को विजेता र आर्मी उप विजेता हो । सेमिफाईनलमा पुलिसले एपीएफलाई ५ विकेट र आर्मीले प्रदेश ३ लाई १ सय १७ रनको फराकिलो अन्तरले पराजित गर्दै फाईनलमा प्रवेश गरेका थिए ।

आर्मीका कप्तान विनोद भण्डारी उत्कृष्ट लयमा छन् । उनले सेमिफाईनल खेलमा प्रदेश ३ विरुद्ध ४२ बलमा समान ५ छक्का र चौका सहित ७५ रनमा अविजित रहेका थिए । समुह चरणका खेलमा पनि विनोदले उत्कृष्ट प्रर्दशन गर्दै आफ्नो विश्फोटक ब्याटिङमा टोलीको सहज जित पक्का गर्न सक्छन् । पुलिसलाई विनोद घातक बन्न सक्छन् ।

त्यस्तै ५ खेलमा ३ अर्ध शतक सहित २ सय २९ रन जोड्दै प्रतियोगिताकै सर्वाधिक रन जोड्ने ब्याट्समान राजु रिजाल आर्मीका मजबुत हतियार हुन् । युवा खेलाडी हरि बहादुर चौहान,रोहित पौडेल,हरिकृष्ण झा,करण केसी,सोमपाल कामी,सुसन भारी,साहव आलम,कुशल मल्ल र जितेन्द्र मुखिया हार्मीका मुख्य हतियार हुन् ।

पुलिसका लागि दिपेन्द्र सिंह ऐरी प्रमुख खेलाडी हुन् । पुलिसलाई उपाधि दिलाउन दिपेन्द्रको प्रर्दशन निकै महत्वपूर्ण रहने छ । त्यस्तै सुनिल धमला,अनिल कुमार शाह,पवन सरार्फ,ललित नारायण राजवंशी,कुशल भुर्तेल,दिलिप नाथ,आरिफको शेखको उत्कृष्ट प्रर्दशनमा पुलिस च्याम्पियन बन्न सक्छ ।

विजेताले उपाधिसहित २० लाख रुपैयाँ प्राप्त गर्ने छ । उप विजेताले १० लाख रुपैयाँ चित्त बुझाउँदा प्रतियोगिताकै उत्कृष्ट खेलाडीले मोटर साइकल पाउने छन् । त्यस्तै उत्कृष्ट ब्याट्सम्यान र बलरले समान ५० हजार प्राप्त गर्ने छन् ।