काठमाडौं(हाम्रोखेलकुद) – सुदूरपश्चिम प्रदेशले आफ्नो अन्तिम खेलमा गण्डकी प्रदेशमाथि रोमान्चक जित हात पर्दै तेस्रो संस्करणको प्रधानमन्त्री राष्ट्रिय एक दिवसिय क्रिकेट प्रतियोगिता अन्त्य गरेको छ ।

मंगलबार मुलपानी क्रिकेट मैदानमा भएको खेलमा गण्डकीलाई सुदूपश्चिमले ४ विकेटले पराजित गरेको हो । सामान्य ९० रनको लक्ष्य सुदुरपश्चिमले २९.२ ओभरमा ६ विकेटको क्षतिमा पुरा गर्याे ।

एक समय १७ ओभरमा ३३–६ को कमजोर अवस्थामा पुगेको सुदूरपश्चिमलाई साँतौ विकेटका रुपमा आकश चन्द र नरेन्द्र साउदले ६० रनको अविजित साभेदारी गर्दै जित पक्का गरे । सुदूरपश्चिमको जितमा नायक बनेका आकशले ३४ बलमा समान २ चौका र छक्का सहित २९ रनमा अविजित रहे ।

दिपेश श्रेष्ठलाई चौका प्रहार गर्दै जित पक्का गरेका नरेन्द्रले ४३ बलमा २ चौका सहित २३ रनमा नट आउट रहे । ओपनर खड्क बोहोरा डक,लोकेश बम १५,कप्तान शेर मल्ल ४,रोशन अधिकारी डक,नरेश बोहोरा १ र विपिन रावल ७ रनमा आउट भए ।

गण्डकीका लागि किशोर महतोले ३,विपिन खत्री २ र दिपेश श्रेष्ठले १ विकेट लिएपनि टोलीको हार टार्न सकेनन् । त्यस अघि मुलपानी क्रिकेट मैदानमा टस जितेर पहिला ब्याटिङ थालेको गण्डकी २०.४ ओभरमा ८९ रनमा अल आउट भयो ।

उसका लागि राहुल शर्माले ४९ बलमा ४ चौका र १ छक्का सहित सर्वाधिक ४१ रन बनाउन बाहेक अन्यले राम्रो प्रर्दशन गर्न सकेनन् । किशोर महतोले १३ बलमा २ चौका र १ छक्का सहित १४ र आकश थापाले १२ रन बटुले ।

गण्डकीका ८ ब्याट्सम्यानले दोहोरो अंकमा रन छुन सकेनन् । गण्डकीलाई सस्तैमा समेट्न सुदूरपश्चिमका लागि विनोद लामाले ६ ओभरमा २ मेडन सहति २५ रन खर्चेर ५ विकेट लिए । त्यस्तै महेश अधिकारी र कप्तान शेर मल्लको नाममा समान २ विकेट रह्यो । नरेन्द्र साउदले १ विकेट लिए ।